石店子69有機書店

【文、圖∕薛常威∕國立中央大學客家語文暨社會科學學系在職專班碩士生】

 

　　關西中正路舊名係「石店子」，故所這條路又安到「石店子老街」，以前盡鬧熱。背尾關西个人口緊來緊少，「石店子」就漸漸落沒下來。

　　毋過這幾年，有幾個後生人摎在地人，將路唇幾間無人戴个老屋，重新整理。慢慢个，開始出現一間間當有特色个小店仔，像以前紹介過个「石店子之冶茶四九」、「初心者市集」，還有「關西關係實驗生活壹號店」、「大自在工作室」，現此時，石店子續變成一個好尞又當有文化个所在。

　　「石店子69有機書店」乜係一間當生趣好尞个店仔。這間書店乜係用老屋重新整理過个書店，「有機」代表一個樹種仔會發芽緊變大，在這位，佢兜無賣書，佢兜用換書个方式來分人客摎在地人發生對話个關係，推廣讀書个習慣，深化在地个讀書文化，希望做得一日一日不停个出現好个循環。


　　這間老屋經過整理，保留紅磚、泥牆、小閣樓等等舊時代个東西，再利用回收个木頭釘書櫃、搬入舊書，書架上个書並無挑工分類，每儕人總係有機會尋到自家中意个一本書。除忒書店个功能，這位同時乜係藝文交流个平台，書店主人結合藝術、旅行个活動分「石店子」老街還較有活力摎人氣。

　　書店主人認為人个旅行摎書个旅行本來斯係當生趣个事情，若係無書來換，乜做得用20塊來支持書店，下二擺正摎想愛分享个書帶過來。

　　書店肚个小閣樓係一間民宿，旅行个人做得在這摎歸屋間个書過夜，乜係一擺當特殊个經驗。

▲BACK