四月八，楊梅紅煞煞；五月節，楊梅嗒嗒跌

【文、圖∕徐貴榮∕國立中央大學客家語文暨社會科學學系兼任助理教授】

 

　　又到黃梅時節，天時一下雨一下好天。雨時烏天暗地，雷公竟令嗊哢；好天時晴光烈日，一身汗流脈絡。這時節，又乜係楊梅時節，人正講：「四月八，楊梅紅煞煞；五月節，楊梅嗒嗒跌。」（圖1）

圖1 將熟的楊梅 拍攝地點：楊明國中前 日期：2019.05.16（農曆04.12）

　　「楊梅」這隻地方，在桃園西南片，過去就係新竹縣，頭擺安到「楊梅壢」，係一個客家庄。仰會安到楊梅壢呢？聽講頭擺係歸坑歸壢、滿哪仔就生生揫楊梅个所在。想當年，逐年到舊曆四月初，楊梅樹頂个楊梅就紅煞煞吔，當像當鍚人食，毋過還食吂得；定著愛經過一隻月，大約係五月節前邊仔，楊梅个紅轉到烏𪐞色正做得食。毋過仰般講，楊梅還係酸丟丟仔，想着口涎水就嗒嗒跌，毋係理想个果子。故所，楊梅雖然熟吔，嗒嗒跌欸又乜無人愛去摘來食，因為：「食桃肥，食李瘦，食楊梅，囥泥竇。」

　　楊梅壢本來係霄裡社个番地，盡早个開發，愛算到清朝雍正年間，有鍾、黃、古姓人來開墾。乾隆50（1785）年以後，正有大面積个開發。當時廣東嘉應州人師爺溫廷協、鍾朝和這兜人，用溫廷協个「協」、鍾朝和个「和」組合「諸協和」墾業團體，招募人員，落來楊梅開墾，過後又派鄭大摸、黃燕禮為佃首，經營墾業。
<　　br> 楊梅東片个黃姓人表示，佢兜來台祖黃台生係在乾隆55年同墾首黃燕禮租地開墾。佢兜老祖先一群人，從海脣个崁頭厝（今永安漁港）登陸，跈等社仔溪河壩上來，一路行等上，行到楊梅壢个時節，發現滿山滿壢，滿哪仔就係生到拶拶个楊梅樹林，堵堵三、四月間，看着細細粒仔像丸仔，紅噹噹个楊梅，生到歸樹仔。有人摘來食看啊，試着酸酸像還有一滴仔甜樣仔，味緒當特別，就隨口講出「楊梅壢」這个地名，這地名一直到大正9（1920、民國9）年，日本人改忒「壢」字為止。

圖2 楊梅大摸街

　　兩百零年來，「楊梅」个楊梅樹斬淨淨咧！伸着一條「大摸街」（圖2）還在該紀念當初開發个「鄭大摸」定定。為着愛尋轉頭擺个楊梅風光，公所在十過年前，開始在學校、公園、大路脣種楊梅（圖3），恁多年來多少有一滴滴仔成果吔！毋過離「四月八，楊梅紅煞煞；五月節，楊梅嗒嗒跌」个特殊情景還當遠。

圖3 楊明國中校門右側的楊梅樹，結實纍纍。拍攝日期：2019.05.16（農曆04.12）

▲BACK