子會笑 哀像烏貓 子會爬 哀像貓嫲

【文／何石松】

 

　　意思係講，做哀仔儕摎細細介嬰兒渡到佢會笑，鬞頭絞髻介哀仔，就像烏貓共樣；渡到佢會爬，無閒直掣介哀仔，潮皮邋胛，就像貓嫲共樣。總講一句，就係愛摎細人仔渡到成人長大，係非常辛苦介。

　　惜子女係爺哀介天性，就像大水流往下共樣，對子女介愛心，係無比止介。尤其係哀仔，人講：「為女雖弱，為母就強」，毋好看該細妹仔當弱樣，係講做起哀仔來，該就不得了囉。因為，佢發揮了哀仔介天性。哀，原旦就係愛介意思。

　　有畜過貓仔介人就知，貓嫲當惜貓子，貓嫲為著貓子介安全，會摎貓子啣到無人尋得著介位所，分佢平安長大。係講分人發現，佢黏皮就啣走，旋風之間，就無魂無影，毋知囥到哪位咧，這就安到貓徙竇。

　　貓徙竇，係講貓嫲會用全部介力量，來保護貓子介安全，佢徙上徙下，跳上跌落照顧細貓子介過程中，輒輒舞到頭烏面暗，歸身屙屙糟糟。食一餐，餓兩餐，還愛分貓子食乳，膚身瘦夾夾仔。做哀仔介人，也共樣，佢用全部介精神來惜佢介細嬰兒。食，愛一口一口慢慢飼，又驚忒燒，會烙著；又驚昶大口，會哽著；又驚飼昶遽，會局著。驚佢無食飽，又驚佢撐壞，愛非常細義介渡。長扯嬰兒飼好，自家肚屎枵到變背囊都毋知，歸身軟怠怠，像貓嫲共樣，伸著一層皮包骨。

　　雖然係恁辛苦介哀仔，佢也毋會呻，倒轉會講「飼子賺半飽，揞子睡半覺」，這就係樂天知命介精神，哀仔介偉大，係無限介。

　　因為，渡子無恁該，愛摎佢渡過各種災厄，提前化解，像呂洞賓渡韓湘子，鍾離權渡呂洞賓共樣。渡，就係渡化介意思；渡，就係提早預防，並化解佢介危險，正經係不容易。

　　比論講，算命先生算著彭祖在20歲介時節就會無命，厥姆聽著以後，食睡毋得，舂上舂下，滿哪仔去拜託人救厥徠仔。後來，好得有桃花女教佢：在暗晡頭12點以前，緊喊「彭祖轉來喔，彭祖轉來喔」，直直喊到12點，聲頦就喊烈，結果，正經救著厥徠仔，佢嗄悿到橫在地泥下了。

　　聽講，李火德介哀仔，聰明又煞猛。佢用背帶背等細人仔上山做事，看著鷂婆在天頂，佢就講：「鷂婆飛過來，嬰兒做秀才；鷂婆飛過去，嬰兒做皇帝。」又生趣又搭句，拿起背帶，無斯收轉背帶介時節，佢又會唸：「背帶收短短，嬰兒賺金賺銀㧡等轉；背帶長又長，嬰兒福多多福壽年長。」這毋單淨「子會笑，哀像烏貓」定定，還有海闊天空介開洋。

　　記得細人仔介時節，識上山撿樵，在該塞排竇肚，刀嫲煞猛去斬去剁，一時無注意，出力剁阿去，哇﹗死無命咧，手指公險險剁斷，血滮等出，𠊎姆緊搐搐撞等來，煞煞尋著該葛藤，摘幾皮葛藤芯，放在嘴肚嚼綿綿，貼在傷口，用手指撚等，該當時，𠊎姆面項有幾下條浪，手有幾下條痕，手摎面就烏趖趖，像烏貓共樣，當艱苦介樣仔。後來正知，該葛藤芯係當苦介。

　　子會笑，哀像烏貓，子會爬，哀像貓嫲。仰般阿姆安到「哀仔」呢﹖原來哀，本旦就係愛介意思。頭擺春秋時代有隻國君，因為佢在生時節非常愛護百姓，所以死後介諡號就封為魯哀公。《呂氏春秋》講：「人主胡可以不務哀士」，高誘註解講：「哀，係愛介意思。」上早時代，百姓摎政府，係父母子女介關係，政府官員，安到父母官，皇太后也就自稱「哀家」，係母儀天下介模範。所以，客家人，就將自家介母親，安到「哀仔」。「哀仔」摎「母親」摎「愛」，係共樣介意思。

　　《詩經》裡肚介「哀哀父母，生我劬勞」，係講「愛𠊎又非常愛𠊎介父母，生養𠊎係當辛苦介」。這就明確介講出了「子會爬，哀仔像貓嫲；子會笑，哀仔像烏貓」介意思。

※此處的「介」為大眾通用的「的」，同教育部訂的「个」之意

▲BACK