賣捽仔火个細阿妹仔（詔安腔）

【文、圖／《安徒生童話全集》（客語版）、譯／李幸妃】

 

說明：本電子報每期１日，將陸續以六種不同客語腔調，來呈現故事內容！

　　天氣真寒，又落雪，討暗啊。今日係一年个頭尾一日——三十夜。在這個暗擱寒个夜時頭，有一個細漢妹子打赤腳在街路直直行。佢對屋下出來个時務猶有著一雙拖鞋，毋過遐有麼个路用咧？遐係一雙真大个拖鞋——恁大，原本係厥依著个。佢過大路遐下，兩輛馬車像飛恁緊傱過來，嚇到佢拁鞋攏舞到打毋見去。一隻仰子尋嘛尋毋會著，另外一隻得一個細漢囝子撿走去。佢講，後次擺佢有細子遐下，會用用鞋來準做搖籃。

　　細漢妹子不得已打赤腳行，一雙腳凍到一搭紅一搭青。佢个舊圍身裙內底有真多番子火，手內猶提一把。歸日，無人拁佢買過一支番子火，無人得佢一個銀角仔。

　　苦憐个妹子！枵擱寒，寒到嘟嘟震，直直行落去。雪花跌在佢金黃个長頭那毛面上，遐虬虬个頭那毛披在佢个肩頭，䀴過去真靚，毋過佢無注意著。逐個窗子門透出電火个光，街路飄出烘鵝个香味，因為今日係年三十夜——佢毋會添放。

　　佢在一間屋下个壁角坐落來，歸身跔做一圝，感覺猶擱較寒啊。佢毋敢轉去屋下，因為佢一支番子火嘛無賣出去，無趁著半角銀，阿怙定著會拁𢫦。擱講，屋下和街路共款恁寒。佢人个屋下正有屋崠定，雖然頭大个縫有用草和爛布塞蹛，毋過猶係會透風入來。

　　佢一雙幼幼个手得討凍到硬去。啊，即算一支細細个番子火，對佢嘛係有好無䆀！敢會用對一大把番子火內底抽出一支，在壁拁撅著 ，來得自家个手較燒暖个？落尾佢抽出一支。哇！番子火著啊，火點著啊！佢拁手圍在火个脣頭。恁燒暖！恁光啊！即像一支細細支个蠟燭。這係一葩奇妙个火！細漢妹子想講自家坐在一個大火爐面前，火爐有鬥金金𥍉个銅腳和銅把手，燒到旺旺旺，燒暖燒暖，真快活哦！唉，這係麼个情形咧？佢正拁腳伸出去，想討得腳嘛來燒暖一下，番子火嗄么去啊，火爐毋見去啊。佢坐在遐，手底正一支燒過个番子火定。

　　佢又撅一支。番子火又著啊，發出光。光照在壁，遐位好定泥變到像薄紗恁透，佢會用直直䀴對屋內去。桌崠鋪白雪雪个布，排靚靚个盤碗，一隻屎肚底裝淰淰蘋果和梅个烘鵝當在遐飄出香氣。猶較奇妙个係這隻鵝對盤底跳落來，背脊面上插刀和𠠃子，搖搖晃晃在泥下行，直直向這個窮苦个細漢妹子行過來。這時務，番子火又么去啊，佢个面前正一扇賁賁冷冷个壁定。

　　佢又撅著一支番子火。這擺，佢坐在靚靚个聖誕樹下。這頭聖誕樹，比佢舊年聖誕節遐時在商店个玻璃門䀴著个猶較大、猶較靚。青青个樹椏面上點幾下千支光光个蠟燭，真多幅靚靚个彩色圖，和掛在店櫥內底个共款共款，在遐對佢𥍉目珠。細漢妹子拁手伸對圖過去。這時，番子火么去啊。聖誕樹崠个燭光越升越高，頭尾變做天崠直直𥍉个星。有一粒星跌落來啊，在天崠劃出一道細細長長个紅光。

　　細漢妹子想像个聖誕樹，「有麼儕過身啊！」妹子講。係一個惜佢个阿媽猶在遐下識拁佢講過：一粒星跌落來，即會有一個靈魂愛去上帝遐跡位啊。

　　佢在壁崠又撅著一支番子火。這擺，番子火拁四脣歸下照到光光光。阿媽出現在光線內底，恁笑面，恁慈祥。「阿媽！」細漢妹子喊出來，「啊！請渡 𠊎去啦！𠊎知，番子火若么去，你即會毋見去啊，像遐燒暖个火爐，歕香个烘鵝，靚靚个聖誕樹共款，即會毋見去啊！」

　　佢攔緊撅著歸大把个番子火，討拁阿媽留落來。歸大把番子火發出猛猛个光，照到像日時頭恁光。阿媽若毋識像這下恁高大，恁靚。佢拁細漢妹子攙起來 ，攬 在胸前。佢兩儕在光明和快活內底飛走啊，越飛越高，飛向遐無寒無冷，毋會枵嘛毋會艱難个所在去啊。

　　第二日打早，這個妹子坐在壁角，面頰卵紅紅紅，嘴角掛著微笑。佢死去啊，在舊年个過年時凍死啊。新年个日頭升起來，照在佢細細个身屍面上。細漢妹子坐在遐，手底猶揢一把燒過个番子火。

　　「佢想討得自家燒暖一下。」人講。無人知佢識䀴著恁多靚靚个物件，佢識恁福氣，跈厥媽共下行對新年个幸福去啊。

〔原作1846年，客語翻譯2019年〕

===========================================================

　　這篇童話發表在1846年个《丹麥大眾曆書》上。佢个內容一䀴即真清楚：一年一度个年三十夜，係大家歡喜个日，毋過有一兜人嗄在遐枵寒。這種枵寒對天真个細子膴身䀴來即嶄然明顯，特別係在佢䀴著好食个物件嗄食毋會著个時務。賣番子火个細漢妹子撅一支番子火，照出對面樓崠好額人个食飯桌：「桌崠鋪白雪雪个桌布，排靚靚个盤碗，一隻屎肚底裝淰淰蘋果和梅个烘鵝在遐飄出香氣。猶較奇妙个係這隻鵝對盤跳落來，背脊插刀和𠠃子，搖搖晃晃在泥下行，直直向這個窮苦个細漢妹子行過來。這時，番子火么去啊，佢个面前正一扇賁賁冷冷个壁定。」頭尾佢「死在舊年个三十夜。」在這安徒生安慰讀者，講佢和佢个阿媽「佢兩儕在光明和快活內底飛走啊，越飛越高，飛到遐無寒無冷，無枵嘛無艱難个所在去啊。」毋過這正係一個希望。正經个「光明和快活」愛自家去創造。上帝係無做恁多个。細漢妹子頭尾猶係死去啊。安徒生在佢个手記內底寫：「𠊎去國外旅行个半路在格洛斯登城堡蹛幾下日。〈賣番子火个細漢妹子》即係在遐跡位寫个。𠊎遐時接著出版商佛林齊先生个批，要求𠊎拁佢个曆書寫一個故事，來配合其中个三幅圖。𠊎擇一個窮苦个細漢妹子提一包番子火做畫面个遐張圖。」這幅圖係丹麥畫家龍布（JT Lumd。bye，1818〜1848）畫个。

▲BACK