南庄貓子

【文、圖∕羅程詠∕國立中央大學客家語文暨社會科學學系客家語文研究所碩士生】

 

　　
看毋着頭前方向
滿哪行尞
頭腦行毋出个迷迷痴痴
心肝走毋出个亂亂茫茫
民權街脣，中正路項
三更半夜，暗摸胥疏

忽然間
該火光光
忽然間
該細細聲胲
嘍人往前，嘍人進前
進前一看
「蓋一細貓子也」

𠊎頓恬，你頓腳
𠊎動手，你動腳
頓首、動手、頓腳、動腳
你來𠊎往

好在，𠊎罐頭在手

你目盯盯，定定湊過來
像毋識食過飯樣
囫到滿地泥

話着大大目珠个你
既經準備接受𠊎
話着萬事準備好勢
愛同你拚該央時
手吂伸出
斯分你
爪到滿手血

麼个都無摸着个𠊎
毋知風向
乜毋知方向

（南庄海陸腔）

羅程詠－聲檔－南庄貓子

▲BACK