詳細討論【欠】字

【文／范文芳∕國立清華大學中國語文學系退休教授】

 

　　
一、從字形講起
　　從甲骨文个字形看來，欠係形容ㄧ個人撥大嘴空，透大氣，台華語習慣說打哈欠，台客語慣習講打｛ham｝，我認為{ham}係哈欠｛ha｝｛kiam｝个客語聯音結果。

　　從欠字衍生出盡多常用字，做得用傳統文字學六書理論來解說。

　　1 .次，人撥大嘴噴出口水，係指事字，台華語說打噴嚏，台客語講打哈秋。
　　2. 坎，土係表意个形符，做為部首，欠係表音个聲符，駁坎、田坎、坎頂都係客語常用詞。欠係表音个聲符，土係表地形个意符，坎係形聲字。
　　3. 吹，左片个口，正片个欠都係表意个形符，字意係用口出力噴氣。裡隻漢字係會意字。
　　4 .炊，左片个火，正片个欠都係表意个形符，字義係用火煮水，利用蒸汽炊熟食物，炊也係會意字。
　　5 .砍，左片个石，係意符當部首，正片个欠係聲符，裡隻字係形聲字，本意係指上古時期，人用石斧擊打、切割動植物。

二、字音个討論
　　1. 欠，客語音｛kiam｝，砍、坎、歉、飲、欽等字都從欠得聲。台華語已經失去閉口鼻音收尾｛m｝之韻母，一律併入舌尖鼻音收尾｛n｝。
　　2. 次，客語音｛cii｝，因為係象形指事个漢字，字音同欠無關，姿、瓷等字，就係用次表音个形聲字，韻母都係｛ii｝。
　　3 .欣，客語音曾經有爭議，到底係｛hin｝還係｛him｝？從文字結構來討論，就必須先考證，【斤】、【欠】兩字，何者表意？何者表音？從古文字學个角度來看，表意个應該係【欠】，指人之呼吸、精神，毋係指刀、斧个【斤】，可見表音个係【斤】，斤字音｛gin｝，故所欣字客語應該音｛hin｝毋係｛him｝。
　　4. 砍，客語音｛kam｝聲調係陰上，照字音來推論，客語形容受著重物壓傷，慣講【砍著】，音｛kam do｝兩字聲調都係陰上，砍字音義都合。

三、語意、語法个討論
　　1.欠，本意係名詞，詞意係指打哈欠裡種行為，引申做動詞缺少，欠人錢，萬事具備只欠東風，都係動詞个用法。
　　2.次，本意係名詞，詞意係指打哈秋裡種行為，假借做量詞次數，三番兩次，客語東勢腔習慣講个【下次擺】，竹、苗腔比較常講【下二擺】。次，還 有一種用法，係當做形容詞用，排在優等、上等个後背，次等、二等都係裡種用法。

（海陸腔）
范文芳教授 聲檔 — 詳細討論【欠】字

▲BACK