龍子里个客家風味

【文、圖／鍾榮富／南臺科技大學應用英語系講座教授】

 

　　高雄市个龍子里，落座啊在愛河同縱貫鐵路之間，本來屬於內惟區，聽講來源係頭擺有「龍水」同「凹子」兩個客家庄合上來个名仔。在二十五期重劃以前，這兩庄頭都係北部徙下來个客家子弟，大家種田過日仔。當時个田埔，係河壩壢，石頭多，粗沙多，欠水，盡難耕。客家人來開墾以後，作圳引水，採用故鄉个掘石深埋辦法，慢慢仔正有田坵个樣仔。早期个龍子里，家家戶戶都有種多少个竹頭，屋仔也係伙房，遠遠看啊去，完全就係客家庄个風味。對田項歸來个父老，坐啊在竹頭下，鋸弦仔，唱山歌，生活同故鄉無麼个差別。

　　二十五期重劃以後，土地个價格飆漲，中人手中捧等新台幣來來去去，一生勞碌个客家鄉親受不了大把大把金錢个誘惑，就恁呢紅瓦屋漸漸仔行入歷史，伸啊在老人家个回憶之中。賣忒伙房，搬入現代化樓仔屋，風光迎接新个生活方式，轉歸故鄉還使得頭臥臥，分人欣羨萬分。但係客家人總係客家人，省省儉儉个觀念還係無改變忒，歇入了樓屋，還係十分簡樸，心理上个伙房本本在該，同鄰舍愛隔開，愛有清清楚楚个楚河漢界。屋前堆滿家拉活座，麼个農具都毋盼得豁忒。裡背設備簡單，素淨个白牆，大大个堂號，恬靜个氛圍，一看就知係客家人歇个都市空間。

　　龍子里外背个大路，來往个車仔盡多，可以講係車如流水，像博愛路同中華路，係外地人愛入高雄市或者高雄人外出必經个交通要道。但係對中華路脣彎入龍子里，一下仔就行入恬靜个莊落。外頭係來往奔忙，分秒必爭个世界，裡背係無人來往，與世無爭个天地。高天天个鋼骨大樓親像分人丟啊在九天紅塵之外，龍子里還係充滿懷古个落寞。

　　這係大都會邊角个客家地區，已經失去了莊頭个味緒，但係斑斑駁駁个鐵皮，孤獨个燈籠，散落四方个保麗龍花盆，矮矮个房屋，合仄仄个通道，這幾仔意象拼組了客家幽暗个環境。當然毋係每一個都會客家地區都係恁樣，毋過龍子里係十分典型个都會客家社區，帶有早期客家先民在高雄市打拚个歷史殘跡，都市向外發展以後，龍子里無跈著現代化个腳步，露出客家在都會分人邊緣化个現象。十過年前，高雄市區還有兩個保存完整个伙房，四四方方，堂號面向街道，左右个橫屋對正廳向外延展，門頭還有牆壁，中央開了大門。遠遠看啊去，就係完整个，保守个防衛單位，盡有派頭。但係兩年來，伙房拆忒了，起了二十幾層个高樓，客家風味在都會區越來越淡薄了。

　　行入龍子里，愐想先民个歷史，懷念客家落寞个背後還有客家硬頸个奮鬥，值得客家後輩長長个透嘆。愛了解都會客家人个心底感想，龍子里本本還係現代客家都會化个代表。

▲BACK