做叩廟－上坪个古

【文、圖／彭欽清／國立政治大學退休教授】

 

　　屋背个阿丙姑過阿米姨恁堵好同吾姆都係苗栗公館北河人，還係細妹卵仔該下就熟事，故所無論大細事情三家人就會𢯭來𢯭去，有東西好食乜會分來分去。

　　阿丙姑个老公異早就過身，自家無降有，揇一個妹仔，𠊎喊佢阿甘姊，招个婿郎係滿來哥。阿甘姊先降兩個妹仔，大个同𠊎同年，細个細𠊎四歲。𠊎讀一年生該年，阿甘姊降第三個，產婆臨暗邊仔來同佢減輕，吾姆去𢯭手，到八、九點正轉，講阿甘姊降來毋順序嗄落月死吔。

　　吾姆還同吾爸講，任產婆喊阿甘仔仰仔挶力，細人仔就係毋下世，尾項阿甘仔嗄失魂，救毋掣就過身吔。佢含等目汁講：「看着阿甘仔救毋轉該下，看等胎肚个嬰兒仔還在該緊舂，實在還毋盼得哪！正經係：『降得過得人雞酒香，降毋過得人四垤枋』」。

　　續下來上家下屋个人就來𢯭手辦喪事。盡記得个係出柩忒愛還山前，滿來哥企在長凳板項，擎一支遮仔，擐一隻包袱仔，在棺材頭頂𨃰啊過，𨃰過該下嘴項還緊呢呢呢呢。

　　吾姆講該就安到做叩廟，餔娘係過身，做老公个照俗會恁樣做。佢講棺肚會放一粒石頭過一粒煠過个鴨卵，𨃰過該下愛講：「𠊎轉去長山，你留在臺灣，等石頭綿忒，鴨卵出子，正來相會。」尾項吾姆講：「原在个婦人家盡毋值，死忒還愛分生人騙。」𠊎問佢仰會恁樣講？佢講，會做叩廟个大體係老公有想愛再過討，就詐意騙講愛轉去長山，喊死忒个餔娘既然葬在臺灣吔，就好好留下來，毋好膏膏纏跈佢飄洋過海轉去大陸。

　　下後滿來哥一直無再過討，大个妹仔招人，婿郎屋下有田有園，兩公婆篤實又肯做，畜一群大細，逐個就教來當好。滿來哥八十大零該下，還會同厥孫仔去山項𢯭做，盡尾一兩年擔着失智症，佢食到九十空仔正過身。

（四縣腔）
彭欽清教授 聲檔 — 做叩廟－上坪个古

▲BACK