龍巖比客話

【文、圖／莊家冀／國立中央大學網學所研究生】

 

　　敗勢！敗勢！黏時正寄過去分你，電話掛忒，煞煞轉去學校同先生借教室錄影片，錄好寄過去分電台經理，歸隻下晝頭就搣這項事情就飽了。『屎又出，飯又綿，雞仔滿菜園』，暗夜又有課，仰結煞正好？

　　第二日電台經理，打過來喊𠊎遽遽去辦「臺胞證」入選了！心肝暢一下，好得前駁仔時間無打爽忒，結果因為赴毋著，用急件處理愛兩千五，加了忒一千銀，上擺護照翕个相片又做毋得用，冤枉正得！想去大陸尞乜幾年有了，打幫這擺有，耐乜愛耐過去，公司、學校事情排好勢續下來最重要就係去同阿公婆講。愛出發該日打早𠊎就轉去埔心老屋同阿公婆講：『莊家个列祖列宗，子弟莊家冀愛參加朗讀比賽，朗讀个題目係阿婆，你好無？請阿公婆保佑』。做得用客話去做一个文化交流，分還較多人知臺灣客話，係隻好機會。

　　到龍巖一下飛行機就有人看起來當虐削，面色青青，佢講可能係冷著，睡一覺目就好，結果比賽該日就待院了，好得人無仰仔，故所參加比賽最重要就係自家身體愛顧好，係發病麼个就毋使比咧！這擺係鄉音、鄉情、鄉愁，𠊎个文章排入鄉情。到𠊎个時節燈打下來，麼个人影都看毋著，本來手驚到激激顫顛倒毋會掣咧，到係前一隻選手係永定腔，分𠊎印象較深，因為這隻腔頭在台灣當少會聽著，雖然聽無佢講麼个，毋過識著當有感情台風又穩健，背尾正經著到最佳聲音獎！

　　好得這擺無空手轉來，帶了兩罐酒、獎狀一紙，承蒙感謝分𠊎機會个朋友，一路項最辛苦个係弘益傳播个陳惠琴阿姊，頭來尾去全佢掌像阿姆樣照顧兜，係無佢𠊎該兩罐酒險險扐毋得轉。

圓樓
發夢臺灣到圓樓
先生朋友恩過天
列祖列宗毋使愁
傳承客話靠兜
戊戌年霜月大雪於永定土樓 贈若琳江


（圖一筆者攝於福建永定土樓）


（圖二比賽選手一行人筆者右三）


（圖三當日演出節目表）


（圖四比賽證書）


（四縣腔）
莊家冀 聲檔 － 龍巖比客話

▲BACK