山區到都市个客家人

【文、圖／鍾榮富／南臺科技大學應用英語系講座教授】

 

　　本來客家人大部分歇啊在山區。全世界客家人最集中个地區就在大陸个贛南，粵北，粵東，同閩西一帶。攤開地圖，頭前講个這兜全部都係行政區个名稱，但係對Google頂上看，就使得看著這一大區實在係一粒山頭。遠遠看啊去，周圍青幼幼，樹林濃密，山雖然毋高，毋過峰峰相連，滿哪都係山。有兜高，有兜矮，有韌崗，有水壢，千里相連，一氣同體，親像分外人毋記得个世界，客家人過个就係這種隔離人塵，安詳恬靜个生活。

　　到了台灣，客家人本本選擇山區來歇。對桃園、新竹、苗栗，到台中个東勢、新社，雲林个崙背、二崙，往南一直到南台灣个美濃、杉林、六龜同屏東个八个客家鄉鎮，或者後山个花蓮台東地區，周圍也係山巒起伏，高高低低，彎路崎嶇，完全係頭擺个客家味緒。

　　山區生活孕育了客家人特殊个山文化。講起客家文化，食个方面，大家最先想著个應該係又鹹、又油、又香个客家口味，包括粄條、封肉、豬腳、覆菜湯等等，無一樣毋係又油、又香、又鹹个料理。客家衫褲，當然就係藍衫，發發个衫袖，長長个裙擺，多少反映了客家人山區耕種，著衫愛講求自然个習慣。客家人歇个圍壠屋、土樓、夥房，可以講都係山居生活个反映。客家人輒常搬遷，每擺到了新个環境，最先堵著不同个種族，愛搶水，愛搶耕種地區，愛有安全，故所屋仔做啊在山區个崗壢之中，若有外族个攻擊，進可以攻退可以守，每一个伙房就係防守作戰个單位。客家人个娛樂主要係山歌，採用樸實个歌詞，唱个曲律可以長，可以短，可以遽，可以慢，「自古山歌從口出」，擘嘴就使得唱。簡單講，客家文化就係山區文化。

　　搬入都市叢林个客家人，遠離了寬敞个禾埕，揮別了山腳下个地泥，失去了看星星，搞放人尋，緊搞緊唱童謠个日仔。都市空間無大，人群又多，生活步調緊張，工作壓力盡大，加上現代人情淡薄，隔壁鄰舍都無相識，莫講路脣來往个人潮了。日夜打拚之後，臨暗時節，在精疲力倦个角落，想愛聽一句簡單个「食飽吂？」都異難得。

　　日頭落山，海風湧來，城市光廊个燈火，一下光起來，有紅有綠，生活个節奏就恁呢行入夜間。機車呼嘯个尖聲，汽車憤怒个喇叭聲，一聲比一聲還過大，還過吵。這係都市，燈火一著，夜生活正醒上來。小民大眾本本愛奔波，本本愛打拚，毋管日啊夜。想起頭擺在山下个日仔，臨暗一來，灶頭脣，屋角邊，聲聲都係溫柔个愛。無愐著，如今人潮來來往往，左看右看都毋相識，燒冷無辦法問。

　　這期開始，請跈𠊎行，請跈𠊎去看港都高雄客家人个腳跡。看佢等離開山區生活以後，仰般過日仔，樣般在都市同人爭地盤，畜大細。


（四縣腔）
鍾榮富教授 聲檔 － 山區到都市个客家人

▲BACK