細老虎堵著年

【文、圖／張捷明／國立中央大學客家語文暨社會科學學系在職專班碩士】

 

　　正月初一，寒風呼！呼！呼！面烏烏个年，揹一隻乾坤袋，踏等北風个腳跡印從北極出發，向南行過西伯利亞、行過雪个故鄉。佢愛去海上蓬萊仙島，半路堵著一隻細老虎。

　　這隻細老虎毋係普通个老虎，厥肩胛像海恁闊，背囊像地泥恁賁，四支腳骨粗過不周山該支堵天楯，尤其係額頭上該隻王字，分分明明清清楚楚。

　　毋過，佢毋係惡老虎，厥心肝摎菩薩共樣共樣，像月光恁軟；厥目珠像日頭恁利，專看烏暗个地方；毋食銅毋食鐵，專食天下間个不公不義。

　　年喊講：「閃開！閃開！𠊎橫打直過，愛去遠遠南方。」細老虎應講：「世間人多辛苦，日圖三餐夜圖一宿，請汝手勢擎高。」細老虎个話年聽毋入耳，當像愛食忒人。

　　『係無三兩三，毋敢上梁山』。細老虎腳步企畀在，兩隻手一搭『啪！』，發出雷公恁大聲。

　　惡人無膽，年一聽大著驚，腳步一下踜蹭打腳偏呆適該。細老虎又大喝一聲『嚇！』就正氣湧上天，春風陣陣向北行。

　　『雲從龍風從虎』，寒風不得不回頭，年只好轉去遠遠雪鄉。

　　愛倒轉該下，年道嘆講：「確實英雄出少年」又將乾坤袋放下，拿出幼幼个紙筆墨硯新衫糖果，搭細老虎送分細人仔。原來，年乜係面惡心善盡惜細人仔。

　　故所下後，細人仔都盡愛過年。還有，為著紀念這件事，每年正月初一，大家都愛打該會發出大大聲『砰！』个紙炮仔，見面就講恭喜恭喜，恭喜又過了一擺个年關。

（四縣腔）
張捷明先生 聲檔 — 細老虎堵著年

▲BACK