伯公生 食伯公福

【文、圖∕徐貴榮∕國立中央大學客家語文暨社會科學學系兼任助理教授】

 

　　「二月二，伯公生，來去食伯公福喔！」客家庄一溜裡來到舊曆二月二伯公生，就有食伯公福个俗。

　　伯公就係土地神，客家人安到「伯公」，學老人喊佢「土地公」。客家同土地神看到像屋下人共樣恁親，對自家个伯公樣仔恁尊重。食伯公福，就係「伯公生」該日，大家在拜完伯公過後，就在伯公下共下吃晝啉酒打鬥敘（圖1）。有兜人還講「伯公生」毋單止二月初二定定，連四月八、八月二、十二月八，這四日也係伯公生日，也就係講有兜客家地區一年四季都有食「食伯公福」。


圖1 食伯公福 拍攝地點：楊梅區埔心福德宮（2012.02.23）

　　因爭伯公管轄个範圍無闊，頭擺庄項个人差毋多都會參加。行到工商業社會个時代，外來个人增加當多，無見得認同本地信仰，也無定著逐儕都有閒參加，還有伯公下也無恁闊，結果變到當年爐主、頭仔這兜，一家一家欸去「題錢」，正把扼仔着參加人數。這種風俗到民國七、八十年，工商業當興个年代，慢慢仔沒落，毋過到這二十年來，可能復古懷念興起，又回復轉來，甚至比頭擺還較旺盛，還較鬧熱。（圖2）


圖2 食伯公福 拍攝地點：中壢後站健福宮（2012.02.23）

　　這下毋使爐主頭仔一家一家欸去題錢咧，愛食伯公福个庄民，在伯公生之前會自動拿錢到伯公下登記。講你就毋知愛信無？中壢後車頭健行橋邊、新街溪脣个健福宮，十過年來，年年二月二伯公生這日，都八十零張桌个人食伯公福，（圖3）今年桃園客家事務局還贈送兩百斤糯米做「平安龜」，當日切來送分逐張桌个人。


圖3 食伯公福 拍攝地點：中壢後站健福宮（2019.03.08）

　　台灣客家地區，庄頭、庄尾、田頭、田尾、屋側、屋角，哪仔都有「伯公」，佢係村庄人民个爺哀、守護神，也係財神、農神、水神、雜務神，同大家都當有關係。庄民初一、十五去敬拜求保庇，賜福、求子愛去拜，生理人初二、十六「做牙」也去拜，求得生理興隆，財源廣進。愛出行、去做兵、旅行，也會去祈求伯公，希望保佑平安順序。係講降子，抑係旅行轉來，也會帶牲儀、果子去答謝伯公。

　　「食伯公福」个歷史到今至少有一千五百年以上吔！南朝梁．宗懍所寫个《荊楚歲時記》講：「社日，四鄰並結宗會社，牲醪，為屋於樹下，先祭神，然後饗其胙」。意思就係講「中國南方在南北朝个時節，伯公生這日，大家準備牲儀在伯公下拜伯公，拜好在伯公下食這兜祭品，該兩時就有伯公生食伯公福个俗吔！」客家傳續這隻傳統到這下，係當有歷史意義同價值个！

　　一年一擺个「食伯公福」，參加个人，無分男女老幼、大人細子，共桌坐尞，心情特別暢快，啉茶食酒打嘴鼓，喜氣洋洋。該種氣氛，愛去參加過个人正知，正經係庄民和樂、敦親睦鄰个景象，表現出客家友善、和諧个社區關係。（圖3）


圖4 食伯公福 拍攝地點：中壢區後寮福德祠（2012.02.23）


（四縣腔）
徐貴榮教授 聲檔 — 伯公生 食伯公福

▲BACK