讀書讀得多，料字寫成科；讀書讀得少，袁字寫成表

【文／何石松】

 

　　「讀書讀得多，料字寫成科；讀書讀得少，袁字寫成表。」這係分讀書人个一種反省，毋好話著讀多書，就毋會寫錯字。意思係講讀書不論多抑係少，一定愛專心專意，正毋會摎料字寫成科，袁字寫成表。看起來像小事情，毋過，在生活上，係講寫毋著字，該就可能愛加了錢喔；又較嚴重兜仔，假使護理師摎安胎寫做打胎，該就正經會收命，賠都賠毋起。可見，「讀書須用意，一字值千金」﹗

　　料字寫成科，袁字寫成表个重點，不在於佢讀个書係多也係少，主要係看佢做事有用心抑無用心。係有用心，錯誤不容易發生；係無用心，潦潦草草，豬肉料寫成豬肉科；袁先生就變成表先生，係當敗勢个。尤其係急心性个人，總想愛遽遽摎事情做忒，好去做別項頭路，也會「心肝頭當急，心字寫成必；讀書無專心，必字寫成心。」「讀書讀得好，旱字寫成早；讀書讀得遽，頷字寫成額。」正經會毋知麼个意思。

　　故所，俚讀書做事，愛用心，愛摎生活結合，非常个用心正好。係講無用心，雖然「四書讀透透，也毋知芋仔摎黃豆。」像該《紅樓夢》裡肚个薛蟠，摎該明朝「唐寅」个圖，講係「庚黃」个畫，無人聽得識。記得頭擺，有人講愛去竹東「阿端哥醬料」看先生，還講佢當識，實在毋知「阿端哥醬料」係麼个意思。喔﹗原來係「何瑞奇醫科」啦﹗正會講佢醫術高明。哈，正經係「讀書讀得多，奇字讀成哥；讀書讀得少，科字讀成料」，毋知愛仰般正好？也有人「讀書讀得好，澳字寫成奧」，愛寄到南半球澳洲个郵件，嗄寄到天西恁遠个奧地利，郵票錢從3500加到歸萬銀。正經係一字值千金啊﹗

　　摎料字寫成科，科字寫成料，盡多係自家見笑定定，毋會害著人。但係，看錯字、注錯射、用錯藥仔，該就得人驚唷﹗民國107年正月十三該日，越南一個護理師，摎醫師開个安胎藥寫做打胎藥，害該懷姙个婦人家強強落胎。正經係「讀書無入頦，安胎變打胎；讀書無用意，實在不應該」。同時，美國也有一個75歲个婦人家，因為頭那痛，去看先生，無想著護理師一下無注意，嗄摎死刑藥劑摎佢注落去，害該婦人家痛苦到噦喤煞天，冤枉死忒，實在不幸。這種「讀書發琢愕，頭痛藥用著死刑藥，實在還無著」个新聞，聽著係盡艱苦个。可見，寫字，用字，看字做事情，愛專心一意，係仰般个重要啊。一字之差，害死人命，愛仰般賠人呢？

　　不管係安胎變打胎，無斯料字寫成科，全係無可能發生个事情。會發生，就係因為自家無心無性，無下無落，粗心大意造成个。故所平時就愛培養心性，專心讀書寫字，所謂「讀十遍毋當抄一遍；看十遍，毋當讀一遍。」正會萬無一失啊﹗

　　記起頭擺个教訓，俚隨時都愛避免「料字寫成科，袁字寫成表」个錯誤；過愛將「安胎變打胎，頭痛藥用到死刑藥」个不幸事件，當做一面鏡仔，時時反省自家，像虎尾春冰个驚心，就會更加了解「讀書須用意，一字值千金」个意義﹗

（海陸腔）
何石松 聲檔 — 讀書讀得多，料字寫成科；讀書讀得少，袁字寫成表

▲BACK