2019年「二槽仔」客家文學過嘆

【文／羅肇錦∕國立中央大學客家語文暨社會科學學系榮譽教授】

 

　　上擺講客家文學个道嘆，這下愛講个係客家文學過嘆，做麼个愛嘆恁多擺呢？𠊎想還係試著客家文學還吂返魂，還無辦法自主自立，客家文學个圃園，還無罅養分，種出來个各篇作品，還吂引起大眾文學个重視，恁樣个作品，還無才調傳種，無辦法爆芽，無辦法綻筍，無辦法生葉，無辦法遞藤，無辦法結苞、開花、打子，故所雖然經過十過年了，還係二槽仔文學。

　　該今晡日台灣个客家文學，做麼个還算毋得一槽个精穀，還無辦法傳代呢？兜做得用品牌、讀者、認識、客話、文字五個重點來分析。先講品牌，客家文學受人重視个程度，一般人聽過看過客家文學个印象仰般，這就係客家文學个品牌。第二個讀者係講客家文學个讀者有幾多？也做得講客家文學个創作者有幾多？

　　再來第三個係認識，係講客家文學創作者對文學个認識程度，做毋得講隨筆寫出來，反正用客話漢字寫出來个東西就安到客家文學。第四个係客話，也就係講創作者使用客話思考同寫作當時，厥客話運用个流暢程度，因為客話流利正寫得出有客家特色有客家味緒个客家文學。近年个客家文學作品有兜係用別種語言撰寫，背尾正改寫到客話，無就用別種語言思考創作，正改用客話用字來寫作，結果文章肚个用詞，不知不覺就分佢用來思考个語言牽等走，恁樣个文學作品無自家个本質，要拿來傳種，也盡難耐。

　　最尾一個重點係文字，本來創作用哪種文字，毋係文學作品盡重要个要求。但係客家文學還在該初創階段，文字運用還吂統一，創新變化个方式還吂尋到，故所跳出傳統用詞彙同語法，還吂有全面个發展出創作个運用規則，結果寫作創新詞用新語法該下，䌈手䌈腳，就盡難寫出有個人風格有地方色彩个特出作品，這係今晡日客家文學異難剃頭个現象。

　　除忒頂項講个五隻難題以外，2003年用恁多粗俗个客話道嘆，係因為當時無麼个人看得起客家文學，無麼个人認識客家文學係麼个，還有兜係客家人自家就還毋承認有客家文學。該係當時𠊎對客家文學環境个道嘆。到今晡日，這兜道嘆个環境係毋係有全面改善，𠊎想大家目金金，一想就知，客話个環境還係呻生呻死，稀哩呼嚕 。

　　你無看到學老人還公開大力宣傳講台灣文學就係台語文學，恁樣繼續下去，下二擺客家文學就無算到台灣文學裡肚。這同「台語」就係學老話，客話毋係台語共樣，客家話、客家文學在台灣，根本無厥个地位，無厥个基礎，無厥个品牌，無厥共同个讀者。恁仔个情況發展下去，對客家文學係當不利个。

　　故所推展客家文學个人，不管對客家文學个研究抑係客家文學創作，理念上愛堅持客家文學係台灣文學也係中國文學，相同道理客話係台灣語言（台語）抑係中國漢語。前世無修个係大陸客家地區完全無客家文學，淨有客家人个文學，結果不管在台灣也係在大陸，客家文學一直分人看到係二槽仔文學定定，無資格在台灣文學中國文學底肚暴芽、綻筍、生葉、遞藤、結苞、開花、打子。故所𠊎又更過寫 2019年「二槽仔」客家文學過嘆。

羅肇錦　聲檔 —　2019年「二槽仔」客家文學過嘆

▲BACK