客家孤島

【文、圖／鍾榮富／南臺科技大學應用英語系講座教授】

 

　　一般想著孤島，就會想著客家話往往係分其他方言包圍，產生方言島。英國詩人John Donne有一句詩講「無人係孤島」，意思就係每一个人都愛同別人交流。無愐著有兜客家人煞歇啊在孤島項。

　　有一年去廣西个北海參加世界客屬同鄉會，會後當地个朋友帶𠊎去圍洲島。坐啊入船，朋友正講圍洲島个歷史。聽講，洪秀全太平天國建國失敗以後，其他族群个漢人，開始展開滅客鬥爭，廣西客家人受到盡深个打擊，毋係分人打死，亂丟啊在荒地上，就係分人強壓送到圍洲島。盡早个下，分人送去圍洲島个客家人大約有四五千戶，單靠番薯、包粟、弓蕉過日子，閒時出海捉魚仔，勤苦過生活。後來經過民國、抗戰、文化大革命等等動亂同災難，客家這段分人苦毒个歷史漸漸淡了。如今圍洲島空氣清新，又有海邊風光，開始發展觀光。但係歇啊在當地个客家後代，還本本種弓蕉過日仔，十分窮苦。

　　聽著這個故事以後，𠊎人雖然已經到了圍洲島，但係無心情遶尞，也無去海脣行，滿心都想入莊頭去看當地客家人个居家生活。屋仔狹狹仔，街道無一闊，但係屋下冷冷淨淨，無麼个人，大部分都去田項做事了。在伯公下，同三四个老人家問話，主要想愛瞭解佢等个口音。可惜當時無準備錄音設備，短時間也聽毋識佢等講个話。後來去過柳州以後，另知得圍洲島講个係帶有柳州口音个客家話。到今，還無機會再去圍洲島調查。毋過，頭那項一直放毋下孤島項个客家同鄉。

　　又一擺，去香港參加中文大學舉辦个客家語言學術研討會，張雙慶教授帶𠊎坐船去荔枝窩客家村落考察。原來清朝以來400年之間，香港地區个客家人一直集啊在香港島北方，對東到西，像一條橫線。客家莊頭，四周圍還係青菜田園，同橫架直架个竹仔，一幅與世無爭个樣仔。但係荔枝窩客家村本身就係一个小島，愛坐船正使得到。上啊到孤島項，一片紅樹林，大大个板根，青幼幼个樹仔，同香港中環地區或者九龍街頭人尖人个現象完全不同。遠遠看啊去，水脣就係客家庄頭，青紅青紅个屋頂，大部分都有歲月个影跡。壁項斑斑土點，牙裡牙嫌，看起來盡有滄桑。下巴下堵著一兩个老人家，滿面風霜，皺皺个面容，愁愁个表情，就像還細个時節大陸關庄頭項隔壁鄰舍个老人家。問佢等莊頭个人，都講出國去煮食了，淨伸老人家掌屋。每年伯公生，人山人海，一船一船个後生人帶等子女，歸來集會，當鬧熱。這兜煮食師傅分散啊在歐洲各國，到位都有共莊人共下打拚。平常時，全村幾乎都係老人家。

　　客家人世代窮苦，到今還係愛賣力耕種正有飯好食。不管歇啊在山頂，海脣，孤島，也係都市之中，客家子弟就恁呢恬恬同生活奮鬥，同大地共同和諧相處。


（四縣腔）
鍾榮富教授 聲檔 － 客家孤島

▲BACK