折福──講食物浪費

【文、圖／彭欽清／國立政治大學退休教授】

 

　　聯合國糧食及農業組織（FAO）統計，全世界每年打爽忒大約13億噸个食物，這兜食物做得解決全世界有10億儕人食毋飽个問題。

　　根據全世界67個國家个食物永續性个調查報告，這幾年來積極減少食物浪費、推廣康健个生活方式、實行生態農耕技術个國家有：法國、荷蘭、加拿大、芬蘭過日本；中國、美國同英國都排毋入前20名。無論係政策也係執行方面，法國一直都帶頭行。

　　聯合國糧農組織講，全世界逐年生產个食物有1/3拿來挑忒，損失兼兼仔1兆美金，也就係臺灣錢30零兆銀，係2018年中華民國總預算个15倍。還過講地球項有緊來緊多人會食毋飽，同食得个東西拿來挑忒毋單只係無道德，還會嚴重破壞環境。

　　2016年法國立法規定，超級市場愛將剩賣伸个食品送分慈善機構，這兩三年，又還較積極減少食物浪費，強制大型商場愛同無賣忒个食物捐分食物銀行、鼓勵餐廳拜託人客同無食忒个東西包轉去，有兜民間組織建議修改保存期限个標示方式，因為有兜食物過期還食得。

　　根據應用程式 Too Good To Go 个報告，單淨保存期限个標示方式就使致到20 %个家庭食物浪費，也係造成大型零賣場浪費食物个主要原因。Too Good To Go 係一個專門反對食物浪費个手機應用程式，使用者同佢下載過後就做得透過 App 尋所在地附近仔哪間店仔有提供當日吂賣忒又還食得个東西。　

　　這份報告講，法國每年浪費 1,000 萬公噸左右仔个食物，就係浪費160億歐元，乜就係新台幣 5578 億銀。為著減少浪費，報告項建議講，同貨項標示个保存期限延長一日，零賣商會少擲 8 萬公噸个食物，省下1 億歐元，臺灣錢35億；家庭食物浪費大概會少 15 萬公斤，省得着35 萬歐元，也就係新臺幣1百20萬銀。

　　有媒體調查，有1 / 4左右个消費者講毋識食過過期个食物；有1 / 4个人在保存期限前一日就會同食物擲忒；淨 10 % 个人會在過期後正拿去擲忒，這兜人大體係年紀較大、有自信自家做得判斷東西還食得無。

　　To Good To Go个報告還建議愛將「最佳食用期限」同「食用期限」个意思講分明。「最佳食用期限」同食物品質有關，除忒生个魚仔、生个肉、生个牛奶這兜較遽變質个食品以外，當多食物在期限過後食並毋會有麼个康健風險。毋過，有 53 % 个消費者毋瞭解這兩種標示有哪無共樣。有个國家就在「最佳食用期限」尾項，加寫「過後還食得」來避免食物浪費。

　　浪費食物就係客話講个「折福」个一項行為，這恁多年來臺灣个媒體乜緊來緊重視這個个問題，也有民間團體擎頭設立食物銀行這兜機構。毋過，公家單位還毋係盡重視食物永續个問題，故所看毋着有麼个打眼个政策同效果。

　　臺灣个媒體根據食物從生產、運送、銷售到消費者手項个歸隻過程，估算2017年3月到2018年4月有6,603公噸左右仔个食物係打爽忒个，係講原在个老人家聽着，定著會講：仰會恁前世、恁折福！臺灣人哪久變到恁夭壽得着！


（四縣腔）
彭欽清教授 聲檔 — 折福──講食物浪費

▲BACK