台灣水色

【文、圖∕薛常威∕國立中央大學客家語文暨社會科學學系在職專班碩士生】

 

　　以前，逐擺去新竹內灣寮，在內灣車頭後背就會看到一間「劉興欽漫畫展覽館」，劉興欽本身就係橫山人，這展館係用來做漫畫藝文展示。毋過，這下換一群後生人接手，摎歸隻橫山作基地，改建成「好客好品希望工場」。


　　這下个負責人，係一個三十歲个後生人吳界，「好客好品希望工場」下背有四隻品牌，其中一隻就係2011年成立个「台灣水色」。

　　新竹縣九讚頭文化協會，係台灣少有个用公益創投觀念去做非營利事業个團隊。因為感覺到當地有當多無頭路个婦人家，正開始成立「台灣水色」這個品牌。


　　一開始，佢兜斯想愛幫助九讚頭村裡肚弱勢个婦人家，尋方法、尋資源、尋未來。運氣乜當好，堵好該下橫山國中家政課用个裁縫車舊忒了，愛報銷。佢兜斯做得用較便宜个價錢摎這兜舊裁縫車買下來。乜當堵好，莊下老一輩个婦人家當多有做裁縫个經驗，手藝乜盡好，斯請這兜婦人家來做衫、作包來賣人，分老一輩个人有錢賺，乜感覺到自己還當有價值。最開始係做傳統个客家花布裁縫，背尾斯請兜後生人來做設計，加入新个、現代个元素，摎生活還過色彩加到設計裡肚，還過因為愛地球，用環保个布料來做產品。透過逐期無共樣个主題開發、季節變化、溫度等，加色彩到設計裡肚變到商品，期望透過手作布料產品摎大自然个顏色共下變出台灣自家个色彩風格，展現台灣个生活文化特色。

　　「台灣水色」个產品在台灣當多所在買得到，今年2019年，第一擺參加誠品生活網路票選个活動。大家一定愛共下來支持這客家子弟在客庄開創个公益品牌。

薛常威先生 聲檔 —　台灣水色（四縣腔）

▲BACK