賣客家膏藥

【文圖／張捷明／國立中央大學客家語文暨社會科學學系在職專班碩士】

 

　　來來來！叔婆伯姆叔公阿伯大哥大姊老弟老妹，大家行兼來！老弟今日來到貴寶地，打拳頭賣膏藥撮把戲。

來來來！大家企兼來！𠊎腳踢南山猛虎，手打電腦文章，筆寫客家詩文，嘴念傳仔笑科。

來來來！大家聽真來！一等人忠臣孝子，兩件事耕田讀書，三山國王天頂看，義民爺爺保家鄉。

來來來！大家愐真來！祖公有交代，能賣祖宗田，莫忘祖宗言，能賣祖公坑，莫忘祖公聲

來來來！大家看真來！𠊎客家膏藥拿出來，賴仔毋講客！孫仔無學客！客家膏藥摎𠊎貼落去，保證細人仔全講客！後生仔全博士！世大人有執作！老人家食百二！

來來來！大家聽真來！客家膏藥拿轉去，大人細子共下貼，從食朝到睡目，從打ㄤ咕、跈嘴尾、打嘴鼓，做盡講客傍溫滾水，包汝一帖見效，三帖斷根。

來來來！大家共下來！叔婆伯姆叔公阿伯大哥大姊老弟老妹，大家齊努力，客家文化萬年昌。


張捷明先生 聲檔 —　賣客家膏藥（四縣腔）

▲BACK