平鎮黃復興號兄弟同心

【文、圖∕徐貴榮∕國立中央大學客家語文暨社會科學學系兼任助理教授】

 

　　平鎮南平路愛上埔心个路項，過忒鎮安宮無幾遠吔，在左手析就看得着頓等一隻看板，寫等「黃復興號」三隻大字。順等這看板脣个正鏞路落去一下仔，一棟無幾大个伙房屋就在若面前，門樓頂鑲等「千頃第」三個金字（圖1），這就係平鎮八角塘个黃復興號黃屋。

圖1 八角塘「黃復興號」个門樓「千頃第」

　　黃復興號黃屋同附近仔个黃屋共樣係堂號「千頃第」以外，其他當多無共樣。第一、原鄉無共樣，佢兜係從饒平來台，附近黃屋係從鎮平（現在稱「蕉嶺」）來台。第二、來到平鎮个時間無共樣，佢兜當慢正來到平鎮，無像附近黃屋在清朝時代就到這位咧！第三、職業無共樣，佢兜係醫藥界，附近黃屋世世代代耕田，田地當闊。

　　黃復興號上祖仔15世黃信義，係從廣東饒平縣過海來台，在康熙56（1791）年先到南崁一搭仔開基，賺當多錢，富甲一方，毋過後代子孫食鴉片煙，同財產敗淨淨，徙个徙、走个走，搬到其他各地去，20世黃阿喜在日本時代大正初年，正搬到鎮安宮後背這位來耕田，降隻倈仔安到黃金龍。

　　到這位過後，煞猛做事，漸漸仔賺兜錢，二十零年過後，在昭和10（1935、民24）年，同劉屋人買一垤園仔起屋，就係這下个屋場。初期起个係黏瓦泥磚屋，民國45年過起橫屋同門樓到這下。該央時因為屋下苦，黃金龍讀南勢公學校讀到五年生無錢好註冊，想放忒無愛讀吔！當時厥先生鄧永賢看着恁聰明个學生仔，無讀畢業實在忒打爽，就走去同厥爸講：「你係無錢𠊎同你𢯭繳！」就恁樣小學讀畢業吔。小學畢業過後，去同人掌牛，隔壁个姑丈在埔心開藥店，想着掌牛有麼个出息？在這小所在毋會有麼个發展，就紹个佢去台北迪化街个乾元中藥材行學師仔，該間中藥行還有兼買賣藥材，長透走旅順、大連，故所黃金龍跈等學拈藥仔，又跈等去𢯭割 中藥材。因爭頭腦好、精靈，手腳當遽，學麼个像麼个，無幾久做下做到當熟絡。

　　民國35年轉來平鎮屋下，開中藥行兼做進出口生理，正式營業，安名「黃復興號」。到底仰會安到「黃復興號」呢？聽這下做中醫師个黃幸助先生講，厥爸黃金龍想愛復興頭擺黃家个興旺，正安這名號。還在屋頭前个石頭項刻「石能个性是吾友」，在另外一粒刻「竹解虛心稱我師」來勉勵屋下人（圖2）。同時希望三個倈仔愛同心合作，係無就毋好做共行。人講：「兄弟同心，齊力斷金。」正經，三兄弟在阿爸个帶領之下做藥仔，買賣藥材，做到當成功。黃幸助先生還在民國62年考着中醫師，到這下，係有名个老中醫師，倈仔也做中醫師，自家開診所，做得講係醫藥傳家。

圖2 石能个性是吾友，竹解虛心稱我師。

　　黃金龍在民國74年過身過後，三兄弟無分阿爸失望，謙虛做人，良心作醫藥，連心共下打拚，正經復興黃屋過去个名望，經過三十年來，全都七十零歲吔，三兄弟都無分家。一直到102年第二個兄弟仔黃達助過身過後正分食，各做各个頭路，還係無分財產，家族同心共下戴。

徐貴榮教授 聲檔 — 平鎮黃復興號兄弟同心（四縣腔）

▲BACK