遺子千金 毋當教子一經

【文／何石松】

 

　　遺子千金，毋當教子一經，係講爺哀想盡辦法，愛留分子女千萬財產，毋當好好用教育个方法，教佢知上知下，煞猛打拚，把握做人做事个原則較贏。

　　聽講頭擺有一個人，安到趙公明，佢有兩個阿哥。厥爸分厥大哥365棟靚瓦屋，拿來稅人，逐隻月都有收入；分厥二哥365副田地摎桃仔樹，贌分人耕種，逐隻月也有好收租。趙公明係第三个，佢話著兩位兄弟分到恁多个財產，佢乜毋會少正著啊 !，無想著，厥爸嗄分佢一張欠孫大伯200兩銀个借據，佢拿著這張借據，去問孫大伯，無想著，孫大伯嗄摎佢講：「𠊎乜毋知，毋過，無相干啦，你可以毋使還𠊎，係講愛還𠊎，愛加倍个利錢正做得喔。」

　　趙公明聽了以後試著當艱苦，仰般阿爸對阿哥恁好，對𠊎恁毋公平？孫大伯對佢講：「你無聽過『好子毋種爺田地，好女毋著嫁時衣』乜？這安到『人愛人打落，火愛人燒著 ! 』若爸分你讀了十年書，又練了三年武，比起你兩個阿哥，也算著會做得咧，人愛知足正好。」

　　趙公明受到這個刺激以後，毋敢怪怨人，開始非常打拚。無幾久，就摎這200兩銀个債還忒咧。佢又開始學做生理，賺當多錢。毋過，佢發現著一件盡得人驚个事情，該就係：佢兩個阿哥个財產分人騙淨淨咧。

　　原來，厥大哥好賭徼，人講：「贏係礱糠輸係米」，加上十賭九輸，無三個月定，365間靚瓦屋，斯全部分阿九哥買去咧。阿九哥星夜拆屋拆瓦，敲牆打壁，突然發現每扇壁裡肚都礦有金銀財囥，心肝肚在該偷暢。

　　佢又用美人計摎二哥个地契騙來，所有土地摎桃樹，全變阿九哥个咧。佢又發現逐叢桃樹底下全係金箱玉庫，啊，這擺正經發大財咧。

　　大哥二哥身家了淨淨，一個變乞食，硬硬枵死去；一個著著病，嗄突然消忒去。

　　這件事情分趙公明了解厥爸个苦心，也對兩個阿哥个死亡，非常傷心。佢想著厥爸識對大哥講：「你一定毋好賣屋哦，萬一下二擺愛賣屋，愛一間一間賣，賣磚賣瓦，絕對毋好賣地基。」又對二哥講：「萬一下二擺無奈何愛賣所在，桃樹啊，愛一叢一叢賣，一定毋好賣土地唷。」無想著阿爸个苦心籌謀，變做一陣風，正經係「菜籃㧡水，無採工啊 !」。

　　原來厥爸早就知這兩個徠仔會賣所在，驚佢兩儕會摎命根都賣忒，特別在壁肚，在樹下泥竇肚，礦兜金銀財寶，好分佢兜所在賣忒，還有好食使，正會恁樣交代。

　　趙公明一想著這，就下定決心，一定愛摎兩個阿哥賣忒个所在買轉來，還愛好好賺大錢。佢煞猛打拚又觀察天象，利用北斗七星，南斗六星，加上福祿壽三星个總數鬥等到十六星，安到十六兩，就係這下个秤仔。每一兩算一隻星，安到秤星。做生理買賣一定愛公平，係講梟人一兩，就會折自家个福；梟人兩兩，就會折自家个祿；梟人三兩，就會折自家个壽。賣東西，愛做到秤頭翹高高，該就安到「福星高照」。

　　哇，趙公明無從厥爸該位得著半銑錢，能夠還忒一身債；又摎厥哥了忒个財產全部買轉來；又發明秤仔，定下盡多好个規矩，一直流傳到這下，完全係學著做人做事个經典法則。難怪孟子講：「生於憂患，死於安樂」，兩個阿哥在安樂中，毋知好勤儉打拚。趙公明能夠在欠債愁慮之中出頭天，正經係「遺子千金，毋當教子一經」啊！


何石松 聲檔 — 遺子千金 毋當教子一經（海陸腔）

▲BACK