押山水

【文、圖／彭欽清／國立政治大學退休教授】

 

　　自古以來，人就話講：「三里不同風，十里不同俗」；也有人講：「一方一俗」。其實，毋單淨係恁樣，共莊無共姓个人乜輒常會有無共樣个俗。

　　就拿苗栗大湖上坪過年个俗來講，初一朝晨用葷个來敬阿公婆个，就係過年初一个，大體就係鄧屋、陳屋、林屋這兜大姓人，講四縣。其他較細姓个人家係過年初二个，初一敬齋个，初二正敬葷个，加異多麻煩，大體係海陸底，𠊎彭屋就係，記得還細該下，還愛歸日仔食齋，初二拜葷个。𠊎這兜逢年過節敬阿公婆个三牲托盤項還愛放菜刀，隔壁鄰舍看着就會笑講該毋會斫好正敬，阿公婆省使斫。

　　𠊎彭屋人有一項盡特別个係，討親該下男家頭愛押山水。

　　討親該日，男家頭愛拜託一個較老郎个人做且郎頭，帶湊雙个人去女家頭迎娶，佢愛帶等一面鏡仔、一支短劍，過一張符誥去好押煞。等新娘上轎，同符誥貼在轎門項。還過，屋下人愛先準備便一隻雄雞仔，等一轉到男家頭，就同這隻雄雞仔捉來㓾，還愛滴兜雞旺仔在地泥項，滴該下且郎頭就愛緊唸制煞个話語，過後𢯭手个人煞煞同雞仔熝來挷毛、煠好，好分新娘公同新娘趕吉時良辰敬阿公婆。愛等牲儀排好，新娘正做得下轎。

　　𠊎結婚該日當熱，該下个計程車還吂安有冷氣，就淨司機頭前有安一支細電扇仔，吹出來个風係燒个，害𠊎同吾餔娘兩個坐在車肚汗流脈落，等到好敬阿公婆該下，兩個就汗溚溚跌，吾餔娘講下二生人毋敢嫁分姓彭个了。𠊎同老人家講恁樣个俗實在毋好再過傳，係無彭屋个細倈仔會討無餔娘，吾姪仔輩个討親就無再過押山水。

　　吾老屋這下還係過年初二，初一淨食早齋，敬阿公婆个牲儀脣項無再過放菜刀，討親毋使押山水了，日仔還係照常過。

　　人愛跈得着時代，俗乜愛跈得着時代，正毋會分時代逐過䢍。


（四縣腔）
彭欽清教授 聲檔 — 押山水

▲BACK