雙連陂生活工作坊

【文、圖∕薛常威∕國立中央大學客家語文暨社會科學學系在職專班碩士生】

 

　　桃園龍潭个住民大體係客家人，係農業生產，種米、種茶為主个客庄。摎其他傳統鄉鎮共樣，社會現代化造成人口外流，傳統產業緊來緊少。該央時，一群龍潭在地人成立「中正社區發展協會」，以傳承客家文化摎照顧弱勢族群為主要目標。正開始个時節，協會當難做，強強會倒忒，背尾在政府多元就業開發方案協助下，成立「雙連陂生活工作坊」，正慢慢緊來緊好。

　　這下協會摎傳統个客家文化重新包裝，生產花布手工包賣出去，收入用來照顧單身个老人家、新住民、原住民、單親家庭个後生人、二度就業个婦人家，順續變出還較多就業機會。


　　2015年工作坊成功轉型變成一間社會企業公司，希望用企業經營个方式，分學到裁縫、做手工包手藝个學員，未來有機會經營管理公司个據點，利存乜做得繼續回饋社會。

　　工作坊个產品主要係各樣客家手工包，乜有宣傳客家傳統花布，傳承客家婦女个傳統手藝，加上日本樣式个拼布包技藝。

　　「雙連陂生活工作坊」係一個當好个例仔，自客庄開始，利用客家元素，成功發展社區个特色產業，乜分社區个婦人家，有能力自家賺錢照顧自家，順續做得照顧別儕。


薛常威先生 聲檔 —　雙連陂生活工作坊

▲BACK