大哥个畢業旅行

【文圖／張捷明／國立中央大學客家語文暨社會科學學系在職專班碩士】

 

　　大哥今年小學六年生，春假愛去三日兩夜个畢業旅行，三年生个老妹摎一年生个老弟當欣羨，緊問大哥愛去奈尞，大哥講：「𠊎當適這寫宿題，毋好吵𠊎哦。」「喔！好啦。」老妹較乖，應好。毋過，老弟毋信，又問講：「恁奇，寫一暗晡宿題，仰還寫毋忒。」大哥無奈何正講：「天光日𠊎問過先生正摎汝講吓？」

　　第二日，大哥下課轉來，煮好飯食飽夜，無回答。

　　第三日，大哥下課轉來，食飽夜洗好衫褲，正講無想愛去畢業旅行。

　　老妹較爭較知頭天，毋敢再過問；老弟吂知人我，拉等大哥噭講:「汝毋係講，係有去畢業旅行，愛買好搞个紀念品分𠊎乜？」 。

　　大哥盡惜老弟老妹，當毋盼得个同老弟講:「好啦！毋好噭，汝先去睡目，𠊎下二擺正帶汝兩儕共下去畢業旅行。」老弟正歡喜个上眠床睡目。

　　學校畢業旅行个第一日，大哥𢱤出阿叔屋家个三輪車，喊老弟老妹上去坐，自家煞力牯踐，講愛去畢業旅行。佢兜一路唱歌當暢，三輪車去到人家正改忒番薯个番薯園，大哥同主人講話，主人緊頷頭，又摸一下大哥个頭顱，就轉去矣。大哥講今晡日來搞尋寶比賽，麼儕尋著盡多番薯，就有獎賞。該日三姊妹，總共拈著嫩半台人家無愛个番薯子。轉該下，大哥仃工斡去庄仔口个雜貨店買「阿妹達馬」，一儕兩粒，三姊妹食到當暢，又一路唱歌仔唱等轉。該暗晡老弟老妹睡目睡到緊笑。

　　第二日，大哥又𢱤出阿叔屋家个三輪車，喊老弟老妹上去坐，老弟問講：「今晡日愛去奈旅行？」大哥講：「今晡日愛去挖鐵礦。」佢兜又一路唱歌開容笑面，三輪車去到一家鐵工廠門口，大哥入去同頭家講話，過一下仔，大門打開，三輪車踏到廢料區，三姊妹帶好頭家分个手落仔，先比賽拈無用个幼鐵屎，又比賽拚掃，該下晝轉，大哥險險踏毋贏三輪車。大哥將鐵屎載去資源回收場賣，轉該下，又斡去書局買字簿仔同鉛筆，還有兩本故事書分老弟老妹。該暗晡老弟老妹被骨掩等，聽大哥講古聽到毋肯睡，大哥拐講：「乖乖睡喔，天光朝晨還愛去旅行呢。」兩儕正目珠眨等詐睡，心肝緊回味書項个故事。

　　第三日，大哥無𢱤出阿叔屋家个三輪車，老弟問講：「今晡日又愛去奈旅行？用行路係無？」大哥一隻手擐等雞卵，一隻手牽老弟，背囊還揹等昨暗晡烳熟个烳番薯講：「今晡日愛去姐婆該旅行。」

　　三姊妹行去車頭坐巴士，巴士項阿哥先摟兩條烳番薯分老弟老妹食。到了姐婆該，大哥先將賸个烳番薯過仔雞卵拿分姐婆，講愛賢孝姐婆，姐婆當毋盼得个講：「才過吾這三個戇孫仔，恁賢孝恁曉得，頭顱會分𠊎惜光。」接等又問講：「有去看若姆吂，若姆一定目望望仔等汝兜來。」

　　阿姆破病毋會行路，自家一儕搬轉外家分姐婆照顧。三姊妹來到阿姆个間房，阿姆睡轉眠床刀唇，緊摸老弟老妹个頭顱問講：「今晡日仰有閒好來！」，老弟搶等講：「大哥帶𠊎兜去畢業旅行。」大哥拿出三百個銀，雙手交分阿姆，毋過，阿姆看著錢，毋單只無阿𧩣大哥，顛倒發譴罵講：「汝細人仔奈來个錢，窮係窮，窮人更愛有志氣，若爸無在矣，𠊎又破病，汝仰還恁毋增志，愛仰做人大哥，下二擺一屋下人愛仰得春光，無采大家恁惜汝，無采若叔念著子叔情，無議無論檢汝食、檢汝著、還繳汝讀書。」阿姆譴到氣緊惇，大哥嚇到面夾青，遽遽跪下來，老妹也偎兼去緊拍阿姆个背囊，大哥講：「毋係毋係，𠊎有聽阿姆个話毋會做浪蕩子，這係這兩日掃地泥合拈壞銅壞鐵賣著个錢。」續等將兩日个行程講分阿姆知，阿姆目珠眨等流目汁講：「阿姆錯怪汝矣，難為汝小學還吂畢業，就愛代阿爸阿姆辛苦。該有摎頭家講恁仔細無？愛記得人个人情喔！」大哥應講：「有，𠊎知」。

　　該當晝，姐婆煮番薯飯，煎卵，還去竹園肚採竹筍，順續去圳溝捉胡鰍仔同狗鮕琢轉來，狗鮕琢拿來炒薑絲，竹筍就煲胡鰍仔，姐婆見擺就講：「狗鮕琢，愛食正來捉。」老弟老妹食到尋尾。

　　三日兩夜同人無共樣个畢業旅行，就恁仰過忒矣，盡暢个係老弟老妹，有好搞又有好食，還問大哥，奈久還愛去畢業旅行？

張捷明先生 聲檔 —　大哥个畢業旅行（四縣）

▲BACK