平鎮隘寮頂陳屋醫生世家

【文、圖∕徐貴榮∕國立中央大學客家語文暨社會科學學系兼任助理教授】

 

　　平鎮愛去龍潭个金陵路過忒，福龍路右斡東豐路到622巷，有一條細路仔左斡落去無幾遠仔，就看得着連等有三棟伙房屋，總下都係陳屋。第一棟「德星衍慶」係三房个，對中央「德星堂」係二房个，第三棟「星輝衍耀」係大房个。

　　道光12（1832）年，12世陳仰松同厥大个倈仔陳偉和，在廣東嘉應州松口來到台灣，兩子爺共下做淡水廳个糧食官，退休過後，落腳到頭份做兜仔小生理。後來陳仰松轉長山去，厥倈仔陳偉和當有人望，降三個倈仔，安到海源、連源、捷源三大房。

　　大个倈仔海源，又安到謙光，在咸豐8年（1858）22歲个時節，考着正科舉人。該兩時識講愛尋一隻有「頂」又愛有「水」个風水寶地來安居。尋來尋去，尋到平鎮隘寮頂這搭仔，老街溪脣，有頂又有水，十分中意。堵好附近仔早先來開墾个人家，共樣係陳屋人，田地當闊，帶念着共姓情誼，就同佢𢯭手起屋，分兜田佢耕，堵好該兩時竹南頭份發生原住民暴亂事件，海源、連源、捷源三兄弟就徙來這安居下來，三棟伙房屋隔壁連等。

　　後來這好所在，地靈人傑，陳屋專專出人才，尤其在醫、藥界非常有名，聽講到這下為止，三房人个子孫做醫生个超過五十儕，人人就講平鎮隘寮頂陳屋出醫生，做得講係醫生世家。尤其係三房捷源派下，16世陳增祥識做過3屆平鎮鄉長，陳星祥在昭和16（1941）年9月在中壢創立德星醫院，後來邀請二哥陳加祥加入，共下擴大作為現代化个綜合醫院，在民國45（1956）年完成，算在該兩時係桃竹苗三縣市最大个私人醫療病院。

　　目前第一棟三房个老屋，禾埕還保留等鵝卵石鋪个地泥，屋肚放異多書，毋過平時無人，拜託二房管理，尞日正有人轉來（圖1）；對中央个二房，拆忒老屋起過樓仔屋吔，後代子孫還有歇到這位（圖2）；第三棟大房个，看起來當舊吔！生草生草，怕早就無人戴了唷！空留一隻大嫲棟个伙房屋在該（圖3）。

　　頭擺一連三棟个大瓦屋伙房，青堂瓦舍，到暗時定著鬧熱煎煎，何等个風光，毋過到這下，平時恬肅肅，伸着二房派下守等祖先个光榮定定。

圖1 平鎮福林里第一棟陳屋三房「德星衍慶」

圖2 平鎮福林里第二棟陳屋二房「德星堂」

圖3 平鎮福林里第三棟陳屋大房「星輝衍耀」

（四縣腔） 徐貴榮教授 聲檔 — 平鎮隘寮頂陳屋醫生世家

▲BACK