上天講好話 下地保平安

【文／何石松】

 

　　各位鄉親朋友大家好，這下堵堵係大年大節个過年，首先祝福所有个朋友新年快樂，恭喜發財；闔家平安，財丁兩旺；福多多福多多福，壽長長壽長長壽；東南西北方方利，春夏秋冬季季安。

　　今日愛講个係：上天講好話 下地保平安。意思就係在舊曆年二十四个暗晡，愛送灶君爺上天，希望佢多講人間个好話。到年初五出年界，下凡時節，多多保佑大家平安發財，五穀豐登。

　　十二月二十四暗晡就係入年界，也係一般人講个小年夜。在頭擺，大家都愛準備饒粢粄果，牲儀酒水，金銀財寶，送灶君爺上天。愛送神明，一定愛講好話，所謂「毋會講話得罪人，毋會請神得罪神」，係講儘採講話，所有个神摎人都會得罪，還可能會分灶君爺責罰。

　　聽講，羅隱个阿姆妔佢个時節，神仙摎厥姆講，愛送佢一個皇帝子。厥姆當沙鼻，炒菜時節，就緊炒緊講：下二擺等𠊎倈仔做皇帝該時，愛摎某某人㓾忒分佢。講到暢个時節，就摎鑊鏟頓一下，嗄頓著灶君爺个腳髀。灶君爺當閼，就向玉皇大帝報告。結果，撤銷厥倈仔个皇帝命，摎佢變做皇帝嘴乞食命，哪位做事都毋順利。因為毋會講話，自家个倈仔，皇帝命嗄無忒咧，可見講話个重要性。

　　人講：「做事容易做人難，做人容易講話難」，尤其係到入年界時節，愛多講好話，分灶君爺上天正有好話好講。

　　灶君爺仰愛上天呢？原來係愛渡灶君娘轉外家。灶君娘係玉皇大帝个妹仔，生著當靚，有一擺跈等王母娘娘下凡，看著一個細阿哥仔在灶下燒火，嗄分佢迷著，毋肯回轉天庭。佢發現，原來人間就係天堂，比該又冷又孤棲个天頂好加幾下百倍，還可以摎人結婚，實在還好，就決定無愛轉咧。玉皇大帝知了以後當閼，就講：「好啦，嫁出男，賣出女，吂結婚就毋知好轉屋，恁愛燒火，就分你兩儕去做灶君爺摎灶君娘，無食兜苦毋會精神。」

　　佢兩儕結婚了後，苦到屙痢肚，逐日燒火燒到頭烏面暗。毋過，還係當恩愛當快樂。老百姓知佢係灶君爺，就在灶下畫上圖像來服侍。佢兩儕看著老百姓無麼个好食，就會轉到天庭拿兜東西分大家。

　　無想著，玉皇大帝看著厥妹仔轉來个時節，繷頭絞髻，面糊著火燂煤，歸身烏趖趖，看面都毋著。就摎厥妹仔講：「你做毋得恁律不，乜做毋得長透轉，從明年開始，一年正可以轉一擺，該就係在十二月二十四正做得來，年初五就愛轉到人間。」

　　所以，灶君爺逐年十二月二十四暗晡愛上天庭，大家打燂煤除塵灰，摎屋下拚到淨利淨利；著新衫，講好話；還愛準備牲儀果子，送灶君爺上天庭，分灶君爺講好話个本錢。也希望灶君爺能夠上天講好話，下地保平安。正經係：日吉時良，天地開張，躬身拜請，立地焚香，來來來，𠊎俚用：
三杯清酒五碟糖，歡送灶君上天堂；
玉帝面前講好話，下凡帶轉大吉祥。

最後祝福大家：
諸事如意身體好，千祥雲集心情好；
狗年發達豬年旺，年年快樂毋會老。

附：「入年界」或作「入年假」，「入年卦」等，但無法解釋其義。而在古老傳說中，年是一凶猛野獸，每到十二月二十五左右，便會出來吃人。因此，當我們進入年界之時，便要小心翼翼，發矺年錢，追打年獸，以保平安。一旦克服危險，才互道恭喜。因此，古時過年是一辛苦之事，好比過關一樣，因此「年界」又稱「年關」。何況煞有介事之「介」，宜唸「gaˋ」，古時「介」與「界」相同，故主張用「入年界」，海陸客語為「ngibˋngien gaˇ」。

何石松 聲檔 —上天講好話 下地保平安

▲BACK