銅鑼胡集璋就係北越胡志明

【文／羅肇錦∕國立中央大學客家語文暨社會科學學系榮譽教授】

 

　　昨晡日，去看兼兼仔會一甲子沒見面个老同學。約好臨晝十一點邊仔，在內壢火車站相認。因爭會六十年正見面，故所本來想一儕人拿一支牌子寫等「銅鑼人」才認得識，無想著，一行到火車站門就認著了。佢就係寫《胡志明生平》這本書个作者，也係𠊎銅鑼國小共屆共班畢業个胡俊熊先生。

　　相認了後，正坐厥倈仔駛个車仔，載𠊎到厥屋下。見過大嫂，堵堵食第一口佢泡个茶，就開始講有關胡志明个事，也就係厥叔公胡集璋个傳奇故事。原來俊熊哥這二十年來，主要个心力，就係寫這本同胡志明有關个歷史書。歸本書除忒家族長輩交代傳留下來个話以外，還有問家鄉人所聽過有關胡集璋个故事，加上作家吳濁流先生寫个《亞細亞的孤兒》。還毋清楚个部分，佢又去廣東、廣西、雲南各地查問。最遠還問到越南阮愛國个家鄉，瞭解這兜複雜个過程了後，正開始寫這本書《胡志明生平》。

　　這本書个結論係胡志明就係銅鑼人胡集璋。佢離開臺灣去大陸發展，經過離離奇奇講都無人愛信个經歷，背尾續變到無人不知無人不曉个北越國父胡志明。胡集璋從後生離開臺灣到老年以越南領導人个身分過身，自從吂識轉來臺灣。做越南領導人幾十年來，也自從毋識承認佢係銅鑼人，承認佢係客家人。反正就像越南人認定个，大家相信佢係阮愛國，佢係越南人，背尾改名胡志明，這種身分認定，在越南、在中國、在臺灣抑係海外各地，全世界个人也差不多，就恁樣認定，認定胡志明係土長土生个越南人。

　　毋過大概了解俊熊哥提出來个事實同證據了後，加上文書書籍个記載，𠊎想逐个聽過佢講一遍這個故事个人， 無人毋會道嘆。道嘆胡集璋一生人个傳奇故事。但係阮愛國早年个作品，差毋多都係用法文表達。仰會後期變胡志明了後，像《獄中日記》、《胡志明傳》等等，顛倒改用中文來寫作。另外，阮愛國个相片同胡志明个人形相貌，全無相像。故所，還係有兜人懷疑，算來胡志明係毋係阮愛國？

　　這兜疑問，一直到俊熊哥出版這本《胡志明生平》个書了後，將胡集璋同胡志明之間个轉換，交代清楚，疑狐个人，正瞭解到，原來阮愛國變胡志明，係一齣新个《狸貓換太子》个戲。最缺虧个係這本書出版會十年了，世界各國包涵法國、美國、中國、越南、臺灣， 都還無麼个人去重視這「比天還較大个事情」。

　　另外還愛道嘆个係臺灣客家界， 對這个「比天還較大个事情」拿人个無挨無著、無影無跡樣子。無麼个人反應， 無麼个人重視這个驚動萬教翻轉世界个傳奇人物。這係近代史客家人變各國領導人物底肚，分人盡意外也變化盡離奇，事蹟盡特出个客家傳奇人物。 連大家當熟个新加坡李光耀、中國鄧小平、泰國塔新英拉兄妹，都比毋得。

　　臺灣目前个客家，當在該建立客家信心，愛瞭解客家歷史，愛發揚客家精神。應當愛對客家出身銅鑼出去，做出比天較大个事情个胡集璋，好好來研究佢係仰仔轉換到胡志明？仰仔變到越南國父？做麼个後生離開臺灣，後來變成越南國父，一直到佢過身，就毋敢轉來臺灣？做麼个毋敢分人知厥个客人身分？這兜重要又搶時間个事情，慢一日做就會早一日道嘆。希望客家研究有經驗有能力个人，認真思考吾老同學胡俊熊提出來个研究結論「銅鑼胡集璋就係北越胡志明」。

羅肇錦教授 聲檔 —銅鑼胡集璋就係北越胡志明

▲BACK