山精跈尾

【文、圖／莊家冀／國立中央大學網學所研究生】

 

　　打狗毋出門个天時，寒到會死，遠遠就看著頭名到學校个李大哥，大家就相借問恁會早，好得這日頭，到苗栗个時節就出來同人打嘴鼓，下台中像會咬人樣。

　　車仔駛到東勢國民學校，吂坐燒，隔壁一儕先生就講：「後生仔，試著昨晡日有看過你？」，𠊎想昨晡日人佗台北，這係台中敢有看無著？包尾正知係讀書會來打鬥敘个邱文偉先生，今日喜相逢！山精這擺个頭路係負責將發音人嘴型影下來，做得分大家轉去對等來看，因為單淨發音錄音有成時耳公背背，嘴型就係當重要个一隻參考，大自家開始分組下去，發音人開始講醹醹个大埔腔，這腔調味緒像酒越陳越香，羅教授摎陳主任就像鴨嫲渡鴨仔，一間一間去指導學生，因為大自家就係頭一擺出來做田野調查山精乜係，先生講出聽音个孔竅，可比講兩隻聲調相近就會請發音人加念一擺。

　　平鎮社區大學御用司儀「星星學長」，同大自家斯撩到腸仔會笑打結，一下輪等各位同學自我紹介，有人講招生海報愛做田野調查，話著愛係去蒔田捼秧仔，大家斯笑到凳仔會貶轉來，想該央時仰會分人拐入來考碩士班？平時大自家頭路就異無閒了，下班又愛到學校上課，上課就算了，作業報告又一千擔，拜六又無好尞還愛去行田野，冤枉正得！隆薰同學講：「為著這擺田野調查一夜食睡毋得」，好得𠊎係山精，山精毋使愁無米正來煮番薯湯，有人用客話有人用華語，其中餳著𠊎耳公係一隻當特別个客話，這腔調聽起來毋係像講華語个人，又毋係學佬….包尾正知學姊係印尼華僑，誠意十足个客話自我紹介，語言講得出正有力頭，這乜展現了客家文化多元民族个包容性，舊年聽交通大學先生講，有一年客院收著馬來西亞个學生，毋知係拉曼大學个交換生無？其實大自家會認為客院个學生定會講客正做得做研究，該佢兜外國學生愛仰做事？台灣人就無定著會講了，佢兜敢有才調？𠊎識堵過一隻傳爾布萊訪問學人來協會做田野，白人講華語，阿姆大陸人、阿爸美國人自細大陸出世外國讀書，這隻觀念又驗證一擺，做研究同會講客係兩項事情。

　　另外菊芳教授係今晡日頭一擺熟識，聽秀琪先生講政治大學文學硬底，故所佢渡學長姐做民間文學故事田野，先生人蓋好，特別係𠊎用客話complain學生係有才調讀兩隻科系，行政人員應當愛𢯭手正著！

　　調轉來个田野資料有人看到當入文，這兜珍貴个語料係記音當重要个東西，下晝頭大學同學聽著𠊎佗東勢國民學校做調查，擐等葡萄䟓工來，十幾年畢業个大學同學，開嘴就講毋會煞，想起該央時大學成績打頭名該人，畢業讀研究所正一儕定定。山精𠊎有好畢業就罅核了，研究所喔？「莫想空想缺做事較贏，毋過山精乜會轉性想愛讀書」。

　　寫到這火燒豬頭正知，𠊎電腦插頭還留到東勢國民學校，好得邱文偉先生𢯭手尋轉來，黏皮打電話，堵好佢老妹在學校，插頭無到兩點鐘就尋轉來，又結著一隻好客情好客人。勞瀝！勞瀝！

（筆者與邱文偉主任合影於東勢國小）

（羅肇錦教授記音指導/筆者攝於東勢國小教室）
（陳秀琪教授於本組指導記音指導/筆者攝於東勢國小教室）


（四縣腔）
莊家冀 聲檔 － 山精跈尾

▲BACK