平鎮个「客福佬」

【文、圖∕徐貴榮∕國立中央大學客家語文暨社會科學學系兼任助理教授】

 

　　客人變到學老人，一般就分人安到「福佬客」；係講學老人變到客人，恩兜就喊佢「客福佬」。平鎮係客家庄，毋過又乜有「客福佬」，佢兜主要係莊屋人。

　　平鎮除忒大坑缺、南勢一搭仔个莊屋，係對楊梅矮坪仔徙來个海陸人以外，歸隻大北勢个莊屋，大約都係15世莊德大个後代，在金陵路、興埔路、德育路、關爺南路、中豐路、快速路，包含北富、北興、北勢、新貴幾下隻里。

　　15世莊德大在乾隆32年（1767）對海陽縣（今潮安縣）溪東都江東獨樹石獅巷，帶餔娘同三个倈仔來台，初下碼到淡水，後來搬到桃園大灣庄大樹林（今桃園市豐林里大樹林）開基，過後又再過降五个倈仔、一個妹仔，安到「八大房」。佢兜係縣生、守生、泰生、跳生、來生、祿生、七生、屘生。除忒二房守生、七房七生以外，伸个六房後代在清朝就搬來平鎮大北勢地區開墾吔！下有幾下隻莊屋伙房，各房起各房个公廳，差毋多都有百零年个歷史，門楣安到「錦繡傳家」。

　　大房縣生，先到觀音，後來徙來平鎮，在「關爺陂塘脣大坵田」（今金陵路、德育路、關爺路）个所在耕田，公廳就起到這路脣（圖1）。早期北勢地區當多係鍾屋人个地，縣生第四个倈仔莊廷湧，陸陸續續在這買田起屋。當盛時節聽講有二十零隻灶下，可見當時人口个多，廳下个建材選用當好个福州杉做个。後代又過在老屋脣項起屋，目前還有三座大瓦屋。

圖1 關爺南路158巷，長房派下「錦繡傳家」

　　四房跳生，先到楊梅三湖一搭仔開墾，生活較苦，後代知得大房在平鎮開墾買田當成功，就搬來共下。大約在90零年前，20世莊阿勳到現居地中豐路同鍾屋人贌田耕種。四房乜有公廳，這屋原本係一个私塾先生个屋，識做傳習所，後來賣分中壢黃姓人，莊阿勳來這贌田耕過後，正同佢買起來，變到四房派下个公廳，屋也有100零年吔！（圖2）

圖2 中豐路670巷，四房派下「錦繡傳家」

　　五房來生同八房屘生後代伙房在北興里興埔路211巷內，公廳也係由這兩房共下起个，雕刻當靚當派頭，左四右三總共七橫屋，左片係五房个，右片係八房个，阿公婆分兩片共下拜（圖3），輪流祭祀，面前有當大个陂塘，可見當時个繁榮景象。

圖3 興埔路211巷，五、八房派下公廳祖先牌位，左觀音、右義民爺

　　六房祿生買着北勢庄崩崁个地，降兩个倈仔瑞慶（奎光）同瑞溪（榮光），分家過後，瑞慶分着上屋，在上崩崁一搭仔（今北富里金陵路三段86～90號）；瑞溪分着下屋，在下崩崁（今北興里金陵路二段489巷內）。在這下金陵路三段「金陵華城」面前，當地有一隻小地名安到「莊屋」，新竹客運車牌安名「莊屋」（圖4），也可見當時个盛。

圖4 平鎮市金陵路二段客運站牌「莊屋」、「金陵華城」並稱

　　莊屋係平鎮少數个學老人，後代有做鄉長、市長、代表、議員个，在政治、經濟上當有發展，一溜裡來因為大部分討客人心臼，又長期在客家庄恁久，平時在兄弟抑係家族之間有時還會講學老話，毋過當多後代毋會講咧，21世莊雲山在2000年个時節，還識寫一首用客話讀較適合个＜德大公渡台歌＞咧！

本文主要參考
1. 21世莊雲田先生主編《德大公來台二百四十週年特刊 錦繡傳家》，2006年，莊雲田先生提供、口述。
2. 四房22世莊育樑先生同厥父莊阿全老先生（2029年次）口述。
3. 平鎮市公所《平鎮市傳統式老屋調查研究計畫》期末報告書，2009年，國立台東專科學校，計畫主持人：李勝沐。


（四縣腔）
徐貴榮教授 聲檔 — 平鎮个「客福佬」

▲BACK