該位教授

【文、圖／鍾榮富／南臺科技大學應用英語系講座教授】

 

　　由於個人研究个需要，行了盡多客家所在，主要去做田野調查，錄各種客家話。旅行期間，可以看到各地人文景色个不同，風俗腔調特有个差別。有兜來往个風景人物，讓人難忘，永久都會在心中浮起來，愐著這可能就係客家傳統味緒。平常做田野調查，工作非常有規律，打早就去附近个市場，繞繞仔行行仔，去了解當地人食个東西，熟悉當地文化。日時頭去各地方趕場、錄音。閒个時節，去過多人尞个地方，聽當地人个口音。暗晡頭食飽飯，就坐啊在房間裡肚，聽當日个錄音，萬一無錄好，還會尋時間去再錄一擺。

　　有一擺，去到梅縣个嵩山堡錄音，歇啊在嘉應大學个招待所。食過暗，想愛在房間尞一下，正出去散步。無想著入啊門，都滿曾坐好，就聽著有人叩門个聲音。𠊎感覺奇怪，除了溫昌衍教授以外，無人知𠊎來做田野，仰會有人來尋尞呢？吂知打開門，看著一个頭拿毛全白个老人家，手項拿等一堆稿仔，面帶笑容。「請問係鍾教授無？」

　　𠊎請佢入來坐尞，閒談之下，正知來者係嘉應學院英文系退休个教授。佢講佢以前在大學裡肚教英文語音學，退休下來，無麼个好做。愐著頭擺大學个先生講，英文系畢業生，一生之中，最少愛看過五本以上个經典，正毋會空來一轉。畢業到今，一直尋毋出時間，就恁呢過了半生。退休以後，佢買了五本英文文學个經典，一句一句認真讀，堵著生字就查字典。每隻字都毋放過，毋單止生字个中文意思，讀音，例句等等，都會抄下來。每本書從頭編號。佢帶來个稿仔，就係佢讀Wuthering Height所查个單字表。

　　拿起稿仔來，𠊎詳細看了頭前二十筆，每隻字都寫啊清清楚楚，連筆畫都親像打印出來个印刷體，讀音同中文翻譯也一筆一劃，規規矩矩。𠊎看了非常感動，過去个教育，過去个訓練，就係恁樣深入。連一個學者，離開工作崗位以後，還會想著頭擺先生在教室講个話，還會認真去實現少年時期个夢想。這種精神實在可貴。

　　佢來尋𠊎，主要係希望這兜可貴个心血能夠印出來，分後生人看，讓佢等未來讀英文經典个時節，毋識再去查字典，省下時間來，使得讀過多書。佢个精神值得敬佩，尤其退休後，還會查字典，讀文學經典，補過去半生無辦法做个事情。但係行入文學經典个方法同選擇，各人不同，佢查个生字不見得係其他人需要吔，佢選擇个解釋可能無辦法滿足其他人。

　　談了蓋久，佢囊挾著佢帶來个稿仔，離開房間。佢一路送佢送到佢宿舍門口。到今晡日，𠊎還會浮起佢溫溫个笑容，同佢落寞个表情。


（四縣腔）
鍾榮富教授 聲檔 － 那位教授

▲BACK