上坪个水圳

【文、圖／彭欽清／國立政治大學退休教授】

 

　　𠊎 3歲同爺哀對泰安个燒水（泰安溫泉）徙到大湖个上坪，歇在一間做得講係虎尾寮个竹造屋，原本係起來分吾哥、吾姊在大湖讀書歇个。

　　還細該下，上坪正有幾十戶仔人家，大體就陋陋肖肖，看起來較像樣个屋舍就淨三間，做盡係上坪開莊就來到个，人丁多，耕个田闊。雖然講係佃農，乜係大耕種人，食著毋使愁。其他家人毋係㧡擔做零工就係開河壩田來耕，手面賺食，日仔過來異艱辛。

　　名安到上坪定著係在較高標个所在。對吾屋下看往下係歸十甲个田，行往上幾十步仔，來到伯公下，向東片析看啊去係一大份田同河壩，還過山仔。

　　伯公下行往下成十步仔係大圳，上坪人食个水總下愛來這㧡。𠊎成十歲仔起勢就愛㧡水，㧡到初中畢業。

　　這條大圳係清朝同治手仔作个，當時个頭人鬥股在橫坑附近仔開陂作圳，引大湖溪个水來開田，對南片流過社寮角、七寮崠、上坪，流到水道頭該位，分做兩條，一條流往上，蔭上坪、八寮灣、水尾个田。另一條流往下，流過大湖國小到大湖街尾，蔭街脣个田。

　　莊項个人對在哪㧡水食同在哪洗盪分到分分明明，大圳淨做得㧡水還過洗食个東西。原在人打米篩目會拿到這來漂。𠊎讀小學該下，吾姆會做仙草來賣，仙草乾愛炆以前愛先拿到大圳漂淨來，佢驚𠊎推懶，見擺就會吩咐𠊎：愛分人食个東西，定著愛去大圳洗哦。

　　洗衫褲、洗茶盤就愛去上圳抑下圳，較兼屋下。較屙糟个，像淋肥、淋尿忒个尿桶，定著愛拿到下圳个下截來洗。這規矩係大家認定个，大人恁樣做，細人仔就自然會跈。

　　大圳个水大過深，又有魚仔、蝦公好捉，大人毋會分較細个細人仔去，驚佢分水打走。上圳同下圳个水較淺乜較細，無人洗盪該下，做得覓蜆仔、捉魚仔同湖鰍仔。

　　下後，外位搬來歇个人緊多，屋舍就緊起緊多。民國五、六十年該下，上坪个人屋大體就牽有自來水，圳水越來越少人用。到七、八十年該下，堵好臺灣景氣當旺，大家手頭較鬆容，家家戶戶就安抽水馬桶，屙糟水毋係流到壢溝就係直接流入圳肚。

　　這下，大圳水無人食吔，當多人在該洗盪，上圳同下圳乜早就變到臭水溝吔。看毋着魚仔，看毋着蝦公，乜看毋着湖鰍仔了。

　　米國有一個作家寫過一本《你無法度再過轉去故鄉》个小說。寫佢在外位生活幾十年過後，轉去故鄉个感受。看啊恁多十年來上坪个變化，正經異著。


（四縣腔）
彭欽清教授 聲檔 —上坪个水圳

▲BACK