客語師資公聽會

【文、圖／莊家冀／國立中央大學網學所研究生】

 

　　在行政院106三讀通過國家客家基本法，將俚客話納做國家語言，開場時節，蔣委員講，這係佢上任以來第一擺辦理公聽會，現場來了當多關心客家文化个先生摎朋友。

　　當然現場除了鄉親，分𠊎印象較深係中央大學个研究生，其實有參加過公聽會經驗朋友个人就知，大體會來就係社團代表，看著學生來關心公眾事務，關心自家个文化語言，𠊎試著當湛斗！讀書人毋係關起門，關心自家考試考到仰？外背个事情全無插。當然現場有客話支援先生講兜學生該客話愛加強，雖然先生有強調佢毋係愛講後生人客話个問題，其實這就係語言流失一種現象，後生人仰會講客話緊來緊少？係族群「認同」還係『環境』个問題？這兜事項係值得思考个問題。

　　其實𠊎看著个係一隻語言演變个現象，出生民國四十五十年次堵堵係戒嚴時期，佢兜个客話發音人就係吂推動國語政策推動以前，故所話嶄然烏，大自家在屋下就係講平時講个話，到𠊎這輩出現一隻當生趣个現象，三代同堂阿爸同細人仔講國語同阿婆講客話，𠊎同阿爸講國語同阿婆講客話。

　　歸隻公聽會下來未來愛打拼个東西盡多，毋過最主要還係一隻問題，學校培養恁多人才，係講教育部無編制，該群學生畢業愛去哪位？這乜係委員要求行政單位愛三隻月提出報告針對大學設立客家語文教育學系个原因，現場中央大學个王教授乜提出國家語言法通過後，客委會敢有提出麼个客家語言教學計畫？先生提出个問題正係𠊎想愛問个，有通盤教學計畫學生畢業就會有頭路好做，正毋會分這兜人才歿忒。

　　語言保存係隻大事情，從教育出發係最基本乜最重要，當然愛做个頭路當多，大家共下來關心，政府官員針對客語師資培育草案召開公聽會，這就係分人民知，毋係關起門來做事情，這擺公聽會𠊎乜做直播分想愛關心客家語言个朋友，請大家共下來𢯭手關心客家語言。

▲BACK