精串摎冇串
[譯:]飽滿的稻穗和空心的稻穗

【文圖／張捷明／國立中央大學客家語文暨社會科學學系在職專班碩士】

 

　　一大片經過農家打秧、蒔田、挲草正愛開花个禾串，頭臥臥相爭愛聽日頭講古。腳下涼涼个水「哩哩囉囉」流過去，風輕輕仔吹等來。
[譯:]一大片經過農家育苗、插秧、除草才剛要開花的稻穗，頭抬高高爭先恐後要聽太陽說故事。腳下涼涼的水「哩哩囉囉」流過去，風輕輕的吹過來。

　　朝晨个日頭，企到東片个天頂摎禾串講:「愛聽講古毋使鬥緊，一日之計在於晨，先將日日愛做个事做好來正講。」禾串就開始做事，佢兜先啉(limˊ飲)一口水、伸一下腰做體操，煞猛分自家比昨晡日加較紮、加較高，精神體力更加好。
[譯:]早晨的太陽，站在東邊的天上對稻穗說:「要聽故事不必心急，一日之計在於晨，我們先將每天要做的工作先做好再說。」稻穗就開始做事，他們先喝一口水、做一下伸展體操，努力讓自己比昨天更壯些、更高些，精神體力更加好。

　　日頭企到天頂，正續等緩緩仔講:「講著頭擺个人當辛苦，無麼个伙食存糧，三餐食飯都愛臨時摘、臨時捉。好得下後學著蒔田割禾，正開始有好貯蓄，挨得過做寒、挨得過天旱，禾仔个功勞實在大過天。」禾仔聽著當風神，企到壁竳，目珠看往上。
[譯:]太陽站在天上，才接著慢慢的說:「說到從前的人真辛苦，沒什麼糧食存放，三餐吃飯都要臨時摘取、臨時活捉。還好後來學到插秧割稻，才開始有積蓄，挨得過寒冬、挨得過旱災，稻子的功勞實在大過天。」稻子聽到很神氣，腰桿打直，眼睛往上看，

　　日頭又講:「禾仔雖然有功勞，農家又乜係煞猛做到著，係無耕種人辛苦打田蒔秧，收成奈會有恁好。」所有个禾串聽著緊點頭。毋過，有幾筍禾串，認為係自家正盡好。
[譯:]太陽又說:「稻子雖然有功勞，農家也是努力做到有收穫，要是沒有農人辛苦種田插秧，收成哪會有這麼好。」所有的稻穗聽到一直點頭。不過，有幾芽稻穗，認為是自己才是最好。

　　日頭又講:「毋單只農家有功勞，腳下个水，根下个泥，又乜恁重要，水溶出泥羹肚个養分輸送全身分大家挷相(bangˊsiongˋ)，大家愛學農家人食果子拜樹頭个感恩心，乜愛食水念著水源頭。」所有个禾串又緊點頭緊彎腰。毋過，該幾筍驕傲个禾串企直直毋講好。
[譯:]太陽又說:「不只農家有功勞，腳下的水，根下的泥巴，也一樣這麼重要，水溶出泥巴裡的養分輸送全身讓大家長高，大家要學農人吃果子拜樹頭的感恩心，我們也要喝水感激水源頭。」所有的稻穗又一直點頭一直彎腰。可是，那幾芽驕傲的稻穗站挺直不肯點頭說好。

　　禾串問講:「𠊎兜只能頭臥臥看往上，愛仰摎水還有泥承蒙呢?」日頭就應講:「謙虛、涵養、低頭、彎腰，就會看得著，到該央時汝兜就成熟好收穫矣。」禾串越勢緊點頭應好，就越勢認份吸收水分養分。毋過，該幾筍企直直个禾串，本本毋肯點頭彎腰。
[譯:]稻穗問說:「我們只能頭抬高高往上看，要如何和水還有泥巴感謝呢?」太陽就回答說:「謙虛、涵養、低頭、彎腰，就會看得到，到那時候你們就成熟可收穫了。」稻穗更是一直點頭回答好，就更是認真吸收水分養分。可是，那幾芽站得直挺挺的稻穗，依然不肯點頭彎腰。

　　日子一日一日過，禾串經過不斷个沈思學習，緊來緊有智慧，穀粒抑緊來緊飽滿、緊來緊黃，頭那就緊來緊低。禾串這下正知得，一儕人想愛成功，除了自家个打拚，還愛盡多盡多人个𢯭手，故所佢愛承蒙泥、承蒙水，還愛承蒙風、承蒙日頭，還愛承蒙農家。該幾筍一直毋低頭个禾串，本本肚笥空空面白白，眼中無人。
[譯:]日子一天一天過，稻穗經過不斷的沈思學習，愈來愈有智慧，榖粒也愈來愈飽滿、愈來愈金黃，頭就愈來愈低。稻穗這下才知道，一個人想要成功，除了自己的打拚，還要很多很多人的幫忙，所以他要感謝泥巴、感謝水，還要感謝風、感謝太陽、還要感謝農家。那幾芽一直不肯低頭的稻穗，依然肚子空空臉色蒼白，目中無人。

　　金黃色个禾串，總算等到低頭看著腳下个水摎泥羹，就趕緊誠心誠意講一聲恁仔細。蒔田个農家人乜㓾雞捋鴨拜伯公，感謝天、感謝地、感謝風調雨順、感謝伯公保佑滿田个米白禾黃。
[譯:]金黃色的稻穗，總算等到低頭看到腳下的水和泥巴，就趕緊誠心誠意說一聲謝謝。插秧的農家人也殺雞殺鴨拜土地公，感謝天、感謝地、感謝風調雨順、感謝土地公保佑滿田金黃色的稻作收成。

　　農家開始收割，將謙虛、涵養、低頭、彎腰个金黃色精串，打穀入倉，養育老嫩大細。又將目珠看往上、從來毋點頭、毋低頭、肚屎空空、白色無用个冇串，攉轉田坵肚，分鴨仔罔吮。
[譯:]農家開始收割，將謙虛、涵養、低頭、彎腰、金黃色飽滿的稻穗，打榖入倉，養育一家老小。又將眼睛往上看、從來不肯點頭、不肯低頭、肚子空空、白色無用的不實稻穗，丟回田裡，只能讓鴨子加減啄食。


【張捷明先生 聲檔 —　精串摎冇串（四縣）】

▲BACK