千斤力毋當四兩命——項羽仰般打毋贏劉邦

【文／何石松】

 

　　千斤力毋當四兩命，係講項羽雖然有千斤介蠻力，毋用兜仔計謀摎智慧，乜毋當劉邦介四兩命。人講，命底生入骨，刀嫲斧頭削毋㪐，正經愛看得開。

　　因為命係無形介，看毋著，摸毋著，佢摎吾俚介身體合到共下，做你拿斧頭、刀嫲也無辦法摎命削忒，正經係詏命毋贏，麼介都係命生成。

　　比論講，有萬夫不當之勇介項羽，牛牯都無恁大力，乜鬥毋過才能平凡介劉邦啊！聽講項羽係東海龍王介妹仔摎凡人所降介，出世以後，厥姆就摎佢掉到海脣，無爺無哀仔介細人仔，噭到噦喤煞天，天地神明都分佢嚇著，老虎來飼佢食乳，鷂婆來摎佢抵涼，結果分一個捉魚仔介項梁拈著，摎佢攬轉去，準做徠仔畜，同時摎佢安到項羽。

　　項羽食到十過歲，雖然生到牛牯無恁砸，鐵骨銅腳，就係毋肯讀書，項梁請個武師教佢練武。有一日，佢練跑馬射箭，向東片一直走到海脣。突然之間，一陣大浪打來，走出一個仙女，行到項羽面前，當關心又惜佢介問：「你肚屎枵咧係無？」就拿一隻包仔分佢食，項羽想愛開嘴介時節，仙女一下仔就毋見忒咧，原來，這仙女就係項羽介阿姆。

　　這下，毋知哪位飆來一條大紅馬，馬背囊頂坐等一個著紅衫介，該就係劉邦。劉邦看著項羽拿等一隻包仔佇該發琢呆，就跳下馬來，目珠仁滴滴轉看等該隻包仔，講自家枵到會死，想愛食包仔，項羽人當善良，包仔就分劉邦食忒咧！

　　過無幾久，項羽也肚屎枵咧，毋過，佢離屋下恁遠，無東西好食，嗄枵到噭出來。厥姆聽著，斯又出現在佢身邊，問佢噭麼介，佢就摎頭先介事情從頭一二講一遍。厥姆聽了以後著下驚，就講：「壞忒咧，你有死對頭咧！仰結煞，你知𠊎該包仔裡背有幾多可以打贏劉邦介智慧無？唉！」一片講一片拉等佢，煞煞就唸起分水訣，來到龍王宮，行落一間灶下，摎鑊蓋掀開來，裡背放有九條麵牛，兩條麵虎，並一條麵龍。

　　仙女講：「你遽遽食啦！頭先分你食介包仔係智囊，無想著，嗄分劉邦食去！了忒智慧，無奈何斯有增加你介蠻力咧！這包仔食落去，你就有九牛兩虎還過一條龍介力量，下二擺摎你爭天下介，斯春著劉邦咧！唉！天命注定，無法度改變哪！三十年後，𠊎會來到江邊等你啊！」講忒以後，滿面愁容，目汁闌干。

　　項羽食了以後，𥍉目之間，試著全身有千斤之力。厥姆喊來一個童子，用手一指，就變做一條烏騅馬，又喊來一條龍，佢照龍頭一點，就變一支丈八像斧頭介兵器，然後講：「阿羽啊，這兜全送分你咧，你做你去啊！愛細義唷！」項羽騎等馬仔，拿等寶劍行出龍王宮殿。

　　後來，項羽就用千斤之力拿等寶劍，摎人相㓾，戰爭了幾十年，逐擺都打贏，無一擺輸，但係，最後嗄敗在劉邦手下。爭著天下介果然係劉邦，逼到項羽在烏江脣頭自殺，馬仔變童子，走轉東海去；寶劍變成龍，又泅走咧！啊，麼介都輸淨淨咧。

　　講佢係命，實在毋係命，係一種無形介智慧，任你用千斤大刀，削鐵如泥介斧頭，也係無辦法破解，所以人講：「想計較贏做事，鬥力毋當鬥智」。厥姆千辛萬苦得來介智囊，嗄分劉邦得去。你看四面楚歌介計謀，斯像流水共樣，仰削得斷？正經係，雖然有千斤之力，係講無智慧，也係毋當四兩命啊！

※此處的「介」為大眾通用的「的」，同教育部訂的「个」之意。


【何石松教授 聲檔 —　千斤力毋當四兩命——項羽仰般打毋贏劉邦.mp3（海陸腔）】

▲BACK