台語春秋

【文／羅肇錦∕國立中央大學客家語文暨社會科學學系榮譽教授】

 

　　「台語」係一个集體名詞，毋係專有名詞，不管麼人，看著「台語」這兩隻字，跈等就想著係講臺灣个語言个意思。該講臺灣語言，當然就會想著包含河洛話、客家話、原住民話，同後來个華語、新住民語等等。該講毋承認台語係集體名詞，硬將台語拿來做專有名詞，該在臺灣，最有資格用「台語」來做代表个係，原住民語，毋係學老話。故所，不管台語這隻詞，你將佢看到係集體名詞抑係專有名詞，全部就無辦法用台語來代表閩南語。

　　倒轉來看「國語」這个稱呼，盡早係滿清政府以東北八旗人講个漢滿混雜个話，來做佢統治漢人个共同語，安到「國語」。故所後期，英文就稱滿清「國語」安到滿大人（mandarin）。這係專制時代應用政府个權力，決定當時个官話。一直到國父孫中山推翻滿清，實行民主政治，正用商議表決个方式，決定採北京話來做全國个共同語。聽講當時廣東話差一息仔就分人選來做國語。

　　再來看臺灣，清朝時代來臺灣做官个人，講个也係用滿清官府个國語，來做臺灣个共同語。日據時代用厥霸權，硬講日本話安到國語，其他在臺灣个人講个話就安到台語。因為當時學老人最多，故所，台語差毋多就代表當時个學老話。背尾發現台語肚項，又還有原住民語、客語，高不而將，就將客話安到廣東話，原住民話安到番語，這係日本帝國主義个強霸做法。臺灣光復後，國民黨來到臺灣，也係無照民主个過程，強力推行北京話，當作全臺灣个國語。同國語相對个其他語言，就安到台語，背尾發現台語肚項又還有河洛話、客話、山地話，故所又將台語肚項个河洛話安到閩南語、客話安到客家話、山地話安到原住民語。

　　近幾十年開始，又出現一種講法，硬將學老話安到台語，結果又產生另外一个霸權个做法。將集體个名詞（包含客家話、原住民語等等）拿來當作閩南話个專有名詞。結果，台語變專有名詞，就將客話、原住民話排除在台語之外。這種做法，同清朝政府，同日本政府、同國民黨，共樣个專制。尤其，臺灣就還吂曾獨立，就搶先愛用「台語」這个獨霸稱呼，來當作臺灣个國語。

　　該客家人、原住民仰會堵得著。

【羅肇錦教授 聲檔 —　台語春秋 （四縣腔）】

▲BACK