八角塘風雲

【文、圖∕徐貴榮∕國立中央大學客家語文暨社會科學學系兼任助理教授】

 

　　光緒20年甲午戰爭，滿清政府同日本在黃海大戰打輸，訂下馬關條約，愛割台灣、澎湖分日本。消息傳來，歸台灣人閼到會死，一陣又一陣个組織抗日軍，準備毋分日本人來管台灣。

　　第二年（1895）5月25日，台灣巡撫唐景崧、仕紳丘逢甲這兜建立「台灣民主國」。毋過，日本征台大將北白川能久親王在5月29日就到台灣東北个澳底登陸吔，當遽打到台北，唐景崧、丘逢甲這兜大官員看着大勢無像樣，擲忒這兜抗日民軍，相賽從淡水煞煞偷走，成立無十日个台灣民主國就恁樣橫笐吔，台北城一下就大亂起來，變到無政府个城市，日本人當遽就入台北城，同混亂平定。

　　6月17日，日本設總督府，宣布「始政」接收台灣。跈等就跈縱貫大路下南新竹，一路平順，無遇着麼个阻擋，無想着來到平鎮，客家人開了第一銃。六月初十外仔，日本軍來到中壢，受到暫時在本區義民廟防守个抗日軍偷打，日本軍十分緊張，經過幾擺个調查，知講抗日軍大部分在平鎮八角塘附近仔（圖1），就調當多兵仔攻打安平鎮。帶頭人係黃娘盛、胡嘉猷這兜，打幾下擺都打毋贏，日本兵也死忒好多仔！退轉中壢想辦法。


（圖1 八角塘石碑）

　　黃屋祖先在廣東鎮平縣來，在平鎮係當大个家族，田闊地闊，平時畜當多承勞，也設有學堂教子弟詩書，帶頭人黃娘盛，家學淵源當深，詩文書畫樣樣通。胡屋四片種當多竻竹做風圍，平時畜當多家丁，買刀買銃練武，恁樣做得𢯭做田事，也做得預防賊牯、強盜來搶掠。胡屋主人胡嘉猷，人喊「胡老錦」，從細精明即靈，毋過逐擺考試就考毋着，後來承續阿爸个軍功，捐錢得着監生个名譽，做總糧官，安居虎頭崗下个安平鎮八角塘脣。胡老錦平時練武畜个家丁，無想着這擺嗄拿來抵抗日本人，變成抗日英雄。

　　因為胡老錦屋脣个竻竹硬程，溜溜會滮，銃子打啊落去就滮走，想愛用火攻，又接近毋得，日本人打探着胡老錦全靠一口井來維持生活，係講同井擲壞忒，無水好食，就無法度生活吔！隨後帶兵斡到胡屋後背个虎頭崗頂高，對準該隻井炮打，連續強強炮打个結果，井打壞咧！屋也打壞吔！胡老錦無奈何想愛退出，日本人從正面个八角塘、右片掌路寮、後背虎頭崗三片圍攻打火砲落去。胡老錦這兜帶等兵丁從側角衝出，在八角塘附近仔大戰一場，日本人死傷當多，退轉中壢，抗日軍也損失不少。胡老錦看着井擲壞咧！大門也分火砲打壞吔，就半夜退到龍潭去，準備再戰。日本人知講胡老錦退到龍潭去，第二日就逐到龍潭，龍潭又過再戰一場，抗日軍奈毋何日本兵个長銃火砲，背尾發生龍潭七十三公个慘事。這就係乙未抗日戰爭，客家人在平鎮開个第一銃，歷史上安到「安平鎮之役」。

　　事情過後，無人知黃娘盛走到哪去？聽講等到大局好勢、恬靜無問題吔！佢正偷偷仔轉來，驚分日本人知着，改名安到「黃念初」。因為當有才學，黃姓又係望族，日本政府還喊佢做安平鎮庄長。至於胡老錦，龍潭一戰失敗過後，聽講退到關西深山肚項囥當久，後來偷走到廈門，轉到原鄉梅縣過身。又聽講附近个湯屋側角，有一戶人家識在整田个時節，發現田底下有燒到烏烏个火炭同磚節，過挖下去看着鋪到平平个鵝卵石，當有可能係當年胡老錦伙房屋面前个禾埕。


（圖2 八角塘）

　　到這下，鎮安宮側前个巷路項，還有連等幾下間黃姓伙房屋、公廳，八角塘邊就尋毋着胡屋咧！伸着生到當多布袋蓮个八角塘，恬恬仔睡到該位，任佢風吹日炙、霜降雨打，像等等人去尋轉兩甲子以前个壯烈故事樣仔。（圖2）


（四縣腔）
徐貴榮教授 聲檔 — 八角塘風雲

▲BACK