南部客家無戲劇

【文、圖／鍾榮富／南臺科技大學應用英語系講座教授】

 

　　台灣南北客家人第三個差別係南部客家人無戲劇。北部客家傳統上在每年收冬時節，上演「收冬戲」，請當地个客家劇團擔綱演出，分附近个小民百姓觀賞，大家同樂，象徵一年个辛苦有了收成，做得喘口氣，轉擺一段時間。但係南部个客家人以「完福」做為年終个節慶。南部客家人个「完福」，可大可細，豐年時節，百姓收成好，大家心裡都高興，請大戲，辦廟會，打醮，做生日，麼个花樣都想得到。「完福」兩三日，家家戶戶都會請人客，十分捨得。毋過，「大戲」講个就係學老歌仔戲。一棚兩三十个人，又唱又鬧，文戲武戲，實在也分毋清，但係戲棚頂項人來人往，又打又跳，斬蠻鬧熱。

　　過細个「完福」，請布袋戲，本本係學老戲，毋識聽過客家布袋戲。蓋久以後，有一擺，廟前來了一團撮把戲，宣傳講愛用客家話來做布袋戲，大家都盡高興。毋過，大部分人感覺到趣妙，想愛聽客話愛仰般做布袋戲。做戲个係二崙人，講个係詔安客家話。廟前个戲棚項，鑼鼓喧天，場面也蓋鬧熱，看戲个人盡多，連廟唇个門角上也有人企啊在該。無想到，用客家話來做布袋戲，全村人都聽毋識，動作同口白也毋合南部人个口味，結果戲還吂曾做到一半，看戲个人已經伸無幾儕。本來講好愛做一禮拜，到尾正做兩暗哺就無人看了。後來開始研究客家話以後，𠊎正知詔安客家話係特殊，同南部客家話有盡大个差別，難怪當時个大路關人聽毋識。

　　還細个時節，大部分南部个客家人，毋試看過客家大戲。聽電台个廣播，有小段時間會播客家戲曲，像「李旦見鳳嬌」、「薛仁貴征東」、「三顧茅廬」、「孔明借東風」等等劇目，一聽再聽，大家都聽啊蠟熟。食暗後，禾埕項鄰舍共下坐尞時節，講个話題，除了係掖肥作水圳有關田項个事情以外，大家最好講个就係劇曲中个故事。有兜人講啊口涎必潑，毋只會學角色个腔頭，還會比手畫腳，盡像就在該做戲共樣。係哪堵好有兩儕共樣愛表演，一方扮旦角，一方演阿丑仔，有唱有謔，有噭有懇，百種表情，百樣動作，毋會輸現場看戲。

　　後來在高雄師範大學創辦客家文化研究所後，𠊎正專程上台北邀請鄭榮興教授來高雄講授客家戲曲个課程。只要𠊎有時間，定般會去聽課，了解客家戲曲个源流、背景、同發展。下擺下鄭教授會隨口唱一兩段，比一下身段，做一兩下動作，原來客家戲曲有特別屬於客家个傳統。2003年，鄭榮興客家戲團來高雄義民廟頭前表演，鄭教授親身落去打鼓，戲台項鬧熱煎煎，觀眾人山人海，共下觀賞客家戲曲。從這擺以後，南部客家人正知客家戲曲係登真，係有客家味道。


（四縣腔）
鍾榮富教授 聲檔 － 南部客家無戲劇

▲BACK