一百四十年前來出磺坑打油井个米國人

【文、圖／彭欽清／國立政治大學退休教授】

 

　　苗栗公館出磺坑个老地名安到硫磺窟，隔等後龍溪看過去係打鹿坑、北寮，堵好在牛鬥口項，係原在人講兼番界个所在。北片係石圍牆，向南片行，行得到銅鑼个柑仔樹下過八燕坑，愛去北片个公館抑係南片个大湖都毋係異遠。

　　1859年在米國賓夕法尼亞州个提塔斯維爾鎮（Titusville）有人用機器打着油。1877年，清朝政府買着打油井个機器，請着當地兩個米國人簡時（Kerns）同絡克（Locke）來臺灣个出磺坑。1879年乜用機器打着油，係當時中國第一口油井。

　　Locke有寫日記个習慣，佢同仰仔坐車仔離開故鄉？仰仔坐船仔，先去中國大陸正來臺灣？仰仔對臺南行到出磺坑？在出磺坑仰仔過日仔？做麼个來一年就轉米國？總下記錄下來。

　　厥日記分研究者買着，下後轉賣分中央研究院。陳政三先生，就根據Locke个日記，加佢自家个考證，寫出一本異生趣个書。書名係：《出磺坑鑽油日記：臺灣第一座油礦：1877-1878美國技師開採石油的故事》。

　　Locke1943年過身，1940年八十九歲該年接受研究者Giddens个訪問。訪問稿有出版，《中國个第一口油井：Robert D. Locke个回憶》。可能係歲數大了，講來毋係異伸捙，毋過，訪問稿肚項有好多仔係日記項無講着个。

　　對佢歇了歸年个硫磺窟，佢講：𠊎毋知這細莊仔个名仔，講毋出來。這莊仔歇有差毋多成千儕，四片析種竹仔，有兩個出入口，人家个屋仔係泥磚壁，屋頂用禾稈，暗晡頭有人打更報時掌夜。佢兩儕歇在莊項个廟項，屋頂蓋瓦，正身服侍神明，一間橫屋做學堂，另外一間就佢兩個歇。這間廟，應該係當時个城隍宮。

　　到硫磺窟無幾久仔就堵着舊曆過年，莊項有人年前三日過身，厥屋下人趕過年前同佢還山，二十零個子孫披麻戴孝大聲噭，燒當多香過銀紙，拜全豬全羊，還有煮好个肉。過年該恁多日，當多人來廟項拜喏，燒金香、打紙炮仔，佢兩儕人分煙熏到險發癲。

　　七月初七派兩個兵仔去五英哩遠个大南灣（大湖山肚）買黃梨，買無着。一個扐一粒西瓜轉來，另外一個兵仔就走去後龍一下買十八粒黃梨轉來。

　　Locke歇在硫磺窟期間，看着好多儕分原住民剁忒頭那，工人聽着愛去較山个所在做事，就會打卵退。毋過佢自家識在這下頭屋茄冬坑該位遇着賽夏族人，佢講原住民淨㓾漢人同無共部落个人。有一擺還分部落个人請去招待，佢拿出菸草講係tobacco該下，該兜人講恁堵好，佢這兜乜恁仔講，頭目還講佢係族人个好朋友。

　　佢兩個成下仔會逛去附近仔个莊頭尞，去石圍牆看人製糖，去隘寮下（公館街）个戲園看戲。加拿大个馬偕牧師在四月初六來廟項看佢，第二日兩個技師行去獅潭个獅潭底教堂參加禮拜，下後乜識去過後龍个新港社參加馬偕牧師主持个禮拜。

　　看等佢這兜同清朝政府簽个合約會到期了，該年熱天北臺灣風氣又毋好，當多人著着malaria、傷寒，洋人遰着還會翻。九月底，佢兩儕先後得病，驚講會埋骨他鄉，就遽遽離開硫磺窟，上北到淡水，坐船仔轉米國。

　　實在愛異承蒙這位Locke先生，好得有厥日記，後代人正會知臺灣第一口油井係幾艱辛仔打出來个，也知得該當時硫磺窟个地理人文。


（四縣腔）
彭欽清教授 聲檔 — 一百四十年前來出磺坑打油井个米國人

▲BACK