平鎮南勢南天橋徐屋五代中醫

【文、圖∕徐貴榮∕國立中央大學客家語文暨社會科學學系兼任助理教授】

 

　　《桃園縣志》同舊个《平鎮市志》有寫：「嘉慶初年客籍鎮平人徐良興兄弟三人來南勢開墾，今居民以徐姓居多」。

　　其實，平鎮徐屋有三隻位所，分別係南勢徐屋、北勢徐屋、山仔頂徐屋。南勢徐屋又分三隻徐屋，第一係南華街巷仔肚田中央个徐屋，第二係上南勢南天橋附近仔，在南勢里一鄰17號个徐屋，第三也係上南勢南天橋較東邊个南勢里一鄰一號（這下改到：快速路二段985巷20號）同南東路393巷2弄裡背个徐屋，故所，舊記載正會講今居民多徐姓。南勢徐屋共原鄉鎮平，無共來台祖，也各有各个故事，這就先來講五代中醫个徐屋。

　　第三南勢里一鄰一號个來台祖13世徐俊玉，大約在乾隆末年，從廣東省鎮平縣來台，降五個倈仔，分別係良興、良寶、良通、良遠、良進，這就係《桃園縣志》同舊《平鎮市志》「嘉慶初年客籍鎮平人徐良興兄弟三人來南勢開墾，今居民以徐姓居多」的記錄，其實係五兄弟。

　　徐俊玉來台過後，初下碼開墾南勢庄，安到「大秧地」个地方開基起屋，後來搬到這下老屋个陂塘前，屋背後隔一條土溝就係原住民个所在。到第三代16世个時節，明治31（民前14、1898）年，正徙到這下屋場起屋。初下碼係泥磚屋，二十八年後，到昭和1年（民15，1926），17世个時節，又修建過變到磚仔屋，幾年前因為正身屋頂略略仔漏水，想愛修又難尋傳統瓦師傅，將就同屋頂揜鐵皮屋，從起屋到今有120年吔！（圖1）


　　（圖1：上南勢南天橋徐俊玉派下老屋，正身屋頂已改成鐵皮。）

　　徐屋經過幾代个煞猛打拚，傳到16世徐保辛、保傳，開始學中醫拈藥看病，一直到20世徐文波，一共傳五代，變成平鎮个醫藥傳家，經營藥房，同東勢范屋、南勢王屋齊名，徐文波在二十零年前過身過後，到今徐屋還無人做中醫藥。

　　徐屋家族當大，原來在今南東路393巷2弄肚項還有一棟老屋，毋過在十過年前拆忒咧！分建設公司共下起社區樓仔屋，派下後代還當多人在該，來台祖傳下个阿公婆牌位也安到該樓仔屋一樓（圖2），老屋只供奉開粵一世祖探玄公、二世祖、六世祖及婆太个神位定定。


　　（圖2：徐俊玉派下阿公婆牌位。）

　　徐屋目前除忒耕田以外，早期還做牛販仔賣牛仔，這下在老屋个19世徐維榥老先生，係畜豬仔賣，也代人𢯭畜豬公。屋後背一列个豬欄，看等老宗長在該餵豬公，恬靜恬靜！想當年五代中醫，人來人往，徐屋何等个風光啊！


　　（圖3：徐俊玉傳下世系表。）

　　（資料為受訪者19世徐維榥〔昭和9年生，民23，1934〕先生口述，及參考其出示的徐維明、徐維漢於民國75年所敬錄的《東海堂徐氏歷代宗親族譜》手抄本。圖3）


（四縣腔）
徐貴榮教授 聲檔 — 平鎮南勢南天橋徐屋五代中醫

▲BACK