南北客家人个天穿日

【文、圖／鍾榮富／南臺科技大學應用英語系講座教授】

 

　　南北客家除了「義民」祭典或者節慶儀式个差別以外，另外一个差別就係天穿日。北部客家人佮天穿日當作客家最特別个節日，因為台灣其他个族群都無慶祝這個節日。後來，客家委員會毋知仰仔，就將伊定做客家日，但係對南部客家人來講，實在無辦法瞭解，故所全國客家日該日，南部客家人本本過自家个生活，本本愛做正有好食。

　　聽講台灣北部客家人在農曆正月二十該日，愛尞天穿，放假一日，婦人家毋使耕種，男仔人毋使做田，還愛蒸甜粄，無就做其他粄類，祭拜女媧娘娘，同時愛將粄仔丟啊屋頂上，安到「補天穿」。故事个來源，就係女媧補天。頭頭擺，盤古開天不久，天下一片荒涼，水災多，火災也多，故所當時水神同火神最大，也最有勢力，兩儕輒輒吵事，相爭地盤。有一日，水神同火神相拚，一下無注意，嗄同天頂撞出一個大坑，以後每擺落雨，水就會落到每家人个屋下。天地也變啊無穩，晃來晃去，十分危險。當時，出了女媧，採五色石，練做天頂，補了缺坑，天下正有太平日仔。後來，在中國盡多地方，特別係江南地區个人會在正月初九到三十之間，選一个好日仔，祭拜女媧，過天穿日。毋單尞一日，同時也會做蒸粄丟啊在屋頂上，親像頭擺女媧補天个樣仔。從東晉王嘉寫个《拾遺記》開始，一直到清朝時代，還有盡多文獻記載補天穿个活動。換句話講，補天穿或者尞天穿毋係客家人特別个日仔。

　　來到南部个客家人，早時愛開山，愛爭水，生活當辛苦，除了祭拜伯公以外，生活个重點就係如何安家護地，如何繁衍子孫，無閒講究生活品質。平時唱唱山歌，打打嘴鼓，天一暗，睡目養神，天一光，赤腳上田。可能就係恁呢，無想著祭拜女媧娘娘，也無閒尞天穿。到今晡日，南部客家人本本無辦法瞭解天穿日係麼个。故所每年客委會推行「天穿日係客家日」，南部客家人還係無感無覺，無搭無碓。

　　可能南北客家人來台个時間無共樣，來台以前个生活背景本來就無相同。也可能北部來台祖屬於耕讀之家，心中帶念傳統文化，不論係哪種情形，可以瞭解个事實，台灣南北部个客家人在信仰方面，有蓋大个不同。北部客家人認為天穿日係客家特殊个節日，有必要傳承下去，發揚光大。南部个客家人，到今還毋知穿日愛做麼个，也毋知仰仔祭拜女媧。一个天穿日，兩種解讀方式，這就代表客家文化多元个背景。


（四縣腔）
鍾榮富教授 聲檔 － 南北客家人个天穿日

▲BACK