斤斤計較【斤】字个來龍去脈

【文／范文芳∕國立清華大學中國語文學系退休教授】

 

1 從老頭擺个農耕生活講起

　　大約五千年前，漢文化遺跡，做得印證早期个農耕生活，先民用石斧、石鋤伐草、斬樹、鋤地、耘土、種作。

　　後來，進入鐵器時代，農具改用鐵刀、鐵斧、鐵鋤，當然使得農耕技術大步發展。

　　今日常用个【斤】字，其實就係頭擺个鐵斧，左片係斧口，正片係斧頭柄。後來，【斤】字分人借來用做秤重个單位，在漢字个發展上，就有人在斤字上頭加父字，造出一個新字【斧】，字形結構係从斤父聲，在六書理論上，係形聲字，後來用台斤、公斤表示重量，就係假借字，意思係借斧頭【斤】來代用斤兩【斤】。

2 從字形、字意、字音个角度來看

　　漢字在甲骨文時代，基本上係用線條、圖像來表示具體个事物，裡就係所謂象形字，毋過，生活中難免會遇著無法用線條畫出形狀个心理、狀況，就定著愛用著指事、會意个造字方法，再不然就會採用形聲个造字方法，假使以上四種方法都無法將語音、語意用文字書寫表示出來，還有假借、轉注兩法，以上象形、指事、會意、形聲、假借、轉注六種造字方式，就係傳統所講个六書理論。

　　最古早个【斤】係象形字，字意係刀斧，字音可能接近｛bbu/bbo｝，假借為重量單位，字音可能接近｛gin/gun｝，新造个【斧】係形聲字，斤係表意个部首，父只表音無表意功能，現代漢語有不同發音，台福語音｛bbo｝台客語音｛bu/fu｝台華語音{fu}。

3 漢字个發展，最早多象形、指事兩種創造出來个初文，後來方才借助會意、形聲兩種手法，拼組出更加多个合體字，【獨體為文，合體為字】就係裡个意思。【斤】係初文，【斧】係合體字，後來合體字大量增加，【斤】字有時做為意符，有時做為聲符。

　　【斤】做為表示意符个初文，在舊式查字系統中，就係擔任部首个腳色，字例有斧、斫、析、兵、所等，其中斫、析、兵三字係會意字，斤都表意不表音，斫由斤、石兩初文會意，當名詞用係指石斧，當動詞用係指以斧砍石，析由斤、木兩初文會意，當動詞用係指用刀斧砍樹，引申為分開、分析，兵字原來係會意字，結構係兩手握持斧斤，如今楷體字已不明顯，統合來看，斫音｛jhuo/dok｝，析音｛si/sik/sit/sak｝，兵音｛bing｝，台華、台福保留古音，客語音已簡化為｛bin｝。
　　【斤】做為表示音符个初文，有沂、新、齗、听等字，四字都有｛ing｝音，符合形聲字偏旁个表音功能。

4 經過小題大做个斤斤計較，可以提出兩點小小結論

　　甲 中國官方簡化漢字，聽寫成【听】，聽音｛ting｝【听】音｛in｝字音有誤。
　　乙 台灣客語對【欣】字个合理標音應該係｛hin｝，依據漢字六書理論，欣字係從欠斤聲，假使換一種解釋，認為欣字係從斤欠聲，有兩重錯誤，欠音｛kiam｝，欣字客語無人念｛hiam/ham｝，再講，欣字假使係斤為部首、意符，也講不通，因為【欣】本意多指心情、口氣，再樣般辯解，也當難同刀斧、斤兩連上關係，顛倒過來，用【欠】做意符，【斤】做聲符比較合理，因為【欠】字本為象形、指事字，原指人張口呼氣，嘆氣也係性情相近，歡、歎、欣都係用【欠】做意符。


（海陸腔）
范文芳教授 聲檔 — 斤斤計較【斤】字个來龍去脈

▲BACK