豬埔仔兩三事

【文、圖∕徐貴榮∕國立中央大學客家語文暨社會科學學系兼任助理教授】

 

　　「豬埔仔」在中壢中原路南片一搭仔，這搭仔非常有名，係當特殊个地方。一般人一講着中壢，就會聯想着「豬埔仔」。仰般會恁樣呢？聽講中壢頭擺係台灣北部重要个家畜市場，桃園个「豬子」當優良，受着南北各地農民个歡迎，特別多在這買賣，數量當大，豬販仔賺着錢，就在這消費，故所酒家大興，一直流傳到這下。到日本時代末期正慢慢仔變到風月場所吔！博愛一街到三街係細妹間仔集中个所在，垃圾屙糟，變成治安个一大問題，毋過也係人人當愛講个話題。

　　聽講早期个酒女，單淨陪酒無陪歇宿，生理還異單純。到1960年代，大約係台灣光復十過年後，豬埔仔生理大概傳四代咧！該兩時，經濟蹶起來，小食店、雜貨店增加，烏道落來，正漸漸仔複雜。一直到1992（民81）年打通中豐路，連接中原路並拓寬，失去隱密性，加強巡察，媽媽桑難尋承續个細阿妹仔，失忒特色，人客大減少，情況正改變，到今慢慢仔伸着想像咧！

　　其實會喊到「豬埔仔」，實際情況並毋係恁樣，聽一直戴到當地个民眾講，並毋係因為在當地買賣「豬子」，正分人喊到「豬埔仔」，一溜裡來買賣「豬子」个地方，係在中正路蕃薯市場到大時鐘一搭仔，賣「豬子」个耕種人，一早就在該喊賣，大約到八、九點仔賣忒過後相賽轉屋，哪有可能到豬埔仔消費？反倒轉來，聽講係中南部透夜載愛㓾个「大豬」个豬販，到台北賣忒過後，愛轉南部時節，經過這位，差毋多係當晝過後，就在這消費。因爭佢這兜敢賺敢使，使錢「阿沙力」，一餐下來，消費就當得人驚。故所，「因為載豬仔人个職業」關係，這位子漸漸仔就分人安到「豬埔仔」。

　　還過，在同治10（1871）年，滿清政府將中壢設為「宿站」，中壢變到新莊、桃園到大湖口、竹塹之間个重要站驛。過加上老街溪當深當闊，早期做得通行細船仔載貨，「豬埔仔」下背就係碼頭，脣項个「中壢第一街」熱鬧到講毋得，生理人上來「豬埔仔」消費也理所當然，還較造成「豬埔仔」个傳奇。

　　當時「豬埔仔」个酒家並毋係自家煮，所有个酒食都到附近个「盲目巷仔」个小食麵攤買來，分人客好食。日本時代，中壢五仙之一个劉世富，興南庄人，係一個風流才子，學問醫術，當時無人比得，識做過「以文吟社」个副社長，人喊佢「世富仙」，到今仁海宮龍柱門肚還有厥對聯傳下來。厥哥劉世華係中醫師，有一擺厥老妹發病仔，厥哥醫無麼个效。世富從細聽啊聽仔也聽兜仔，偷翻藥粕一看，知講少一味，就拈加一味藥食落去，厥老妹个病嗄好吔。人知佢知病理，故所也有當多人去分佢看。日本巡查來警告佢，無先生執照做毋得看病，問佢講：「若藥仔有效無？」世富回答佢講：「有效無效？轉去問若餔娘就知咧！」因為警察厥餔娘長透去尋世富看病。

　　世富也係一個鬼靈精，當愛搣射人。有一擺，佢走到豬埔仔一間酒家，從後門偷偷仔溜落去，同「火囪」肚个火灰掞到眠床項，又偷偷仔溜出去。等到夜吔，酒女陪人客食忒酒轉到房間，想愛上眠床睡目，酒醉摸些摸着火灰，閼到大罵「哪隻夭壽子恁夭壽？」

　　又有一輪，有一個酒家女發病仔，去分世富看，世富想愛搣射該隻酒家女，同「體毛」放落藥肚。兩三日過後，佢想看啊到底仰般仔，就去過家尞，問看有效果無？該酒家女嗄笑笑仔講：「有效！有效！」世富恅着自家所做个事，人全毋知，洋洋得意行等出。又過加幾日，世富又再過家尞，該細妹仔看着世富來，好意款待，遽遽雙手奉茶，偷偷仔同該「體毛」放落茶壺肚中「加味」，泡分世富啉。世富啉吔，該酒家女問講：「好啉嗎？」世富也講「好！好啉！麼个茶恁好？」

　　搣射人反倒轉來分人搣射，慶人還愛較慶人來治个風流韻事，豬埔仔故事傳來傳去，留分後人在茶飯過後，閒談之間去打嘴鼓。（故事架構由陳文宏先生口述，本文曾刊載於《文學客家》34期，107.9出版）


（頭擺个人在寒天時係用炙火囪來燒暖身體。）


（四縣腔）
徐貴榮教授 聲檔 — 豬埔仔兩三事

▲BACK