台灣南北客家的「義民」

【文、圖／鍾榮富／南臺科技大學應用英語系講座教授】

 

　　台灣客家人同原鄉客家人最主要个不同係「義民」，在大陸原鄉客家地區毋識聽過「義民」，因為這係完全對台灣本土歷史發展出來个客家信仰。台灣南北客家人个「義民」同樣都係朱一貴事變(1721)同林爽文事變(1786)个犧牲者。在這兩擺事變之中，當時客家人出兵个目的，主要係保護家鄉安全，保護財產同生命，並無特別多个政治考量。但係，朱一貴同林爽文都擎著「反清」个旗號，故所客家人對佢等出兵，堵好形同幫助清朝政府。亂平以後，清廷用「以褒向義」个名義，頒發還生者各種不同个官位，或者秩品，前者有實質个封賞，後者也有名聲。對往生者，朝廷頒以「褒忠」个尊榮，對客家婦女加封「孺人」。

　　南部客家人在亂平以後，對屍體遍地个戰場上，撿出遺體、殘骸、裂骨，有些可認識，有些無可認識，總集葬在竹田鄉西勢村，建「忠義祠」。北部客家人則摎往生者个屍體遺骸等，用車運回，車過鳳山溪，慢慢行到今枋寮義民廟後方，車仔嗄毋停動，故所就將這兜往生者葬埋在該地，後來興建成廟，這就係今哺日个「義民廟」。台灣南北个義民背景相同，但係兩者在文化信仰方面个影響同祭拜个方式上，嗄有大大个差別。

　　北部客家人个義民廟，有宗教信仰个內涵，有固定个節慶日子（農曆七月二十日。）新埔枋寮个義民廟，從祭奉守護客家而犧牲生命个義民開始，極力將義民看做「神」，祭拜方式同坊間其他个神明共樣，有固定个儀式、過程、典禮、祭樂、祭品等等，特別還產生了神豬與神羊个文化建構，不但豐富了客家文化，還產生了全世界獨一無二个神豬養育技術。

　　因為有神个性質，北部客家人徙到那位，就會建義民廟，還會歸家鄉去「割香火」，完全就同媽祖廟共樣。到今，全台灣已經有33座義民廟，分散在台灣各個角落，其中以高雄三民區个義民廟最大，最有人氣。南部客家人雖然也尊奉義民為忠義之神，做「忠勇公」來拜，但係同北部客家人不同个地方，係南部客家人正建祠表旌義民忠勇个行為同事蹟，並無將佢神格化。在南部一般客家人个心目中，這兜義民親像親人也像隔壁鄰舍，離不遠。南部義民祠，每年春秋兩祭，拜者全部都係有頭有面个人物，著長衫，表情硬翹，親像做戲。附近百姓遠遠圍等看戲，三上香，一鞭炮，禮成。大人先生擛擛手，就恁呢離開。留下幾支香，恬恬在該煙灰瀰漫。

　　比較南北客家人對待義民个方式，北部重視儀式，想愛建構客家人个宗教。南部客家人重文化，將義民看作歷史上个回憶。共一段歷史，共樣个犧牲，先輩在天頂上可能也會討論仰會有這種差別。


（四縣腔）
鍾榮富教授 聲檔 － 台灣南北客家的「義民」

▲BACK