降筆

【文∕曾俊鑾∕國立中央大學客家語文暨社會科學學系客家語文研究所碩一 朗讀∕徐翠真】

 

（富興隆聖宮。圖片取自客委會客家典藏）

　　扶鸞係道教占卜个一種方式，又安到扶箕、降筆、揮鸞、扶乩、請仙、卜紫姑、架乩等等。在扶鸞儀式个中央，愛有人做分神明附身个角色，這種人安到鸞生抑係乩身。神明會附身在鸞生个身項，寫出字跡，用來傳達神明个想法，做出神諭。信眾用恁樣个方式，摎神明溝通，瞭解神靈个想法。扶鸞有正鸞、副鸞各一儕，另外有唱生兩儕，還過記錄兩儕，總下安到六部三才。鸞生用一支Y字型桃木摎柳木合共下个樹筆，在沙盤項擎筆劃字，唱生就照字跡唱出來，記錄斯黏時抄下來，最尾主持人解說抄下來个文字。

　　一般來講，扶鸞得著个都係當古典个詩詞文章，大家認為該兜係神明講个話。主持鸞堂个人，定著係當有學問个人，至少，愛對中國个詩詞文章愛當有研究。

　　扶鸞這種事情正經係有影抑係無影無跡？以前褲浪埔（註1）个恩公廟（註2）也有扶鸞，毋過，這種儀式莊肚人大體係喊「降筆」。宗族有一個長輩，𠊎喊佢阿進伯公，佢係當有學問个人，係廟項唸經班个班長，吾婆就係跈佢學唸經个。佢成下子乜會主持降筆，摎信眾解答問題。

　　阿進伯公有一個孫仔，當精當手銃，有一擺佢看著厥公嘴肚緊唸唸唸唸，當像在該準備第二日个降筆，佢就恬恬仔跍在脣頭偷偷仔聽，兩下半就摎阿進伯公唸个話一五一十做盡背下來咧。毋單淨恁樣，佢還走到街路，見人就講：「𠊎知天光日降筆吾公會講麼个咧！」有人就應：「細人仔知麼个屁卵，神明吂講話你就知？亂講！亂講！」孫仔又講：「你毋相信？𠊎摎你講，吾公天光日降筆會講仰般仰般恁樣恁樣……」。就恁樣，通莊人就知這項事情，就厥公摎降筆該幫人毋知定定。

　　第二日暗晡，廟項尖尖揫盡多人來看降筆，比過年過節還較鬧熱，六部三才論時乜無看過恁盛大隆重个場面，難得看著莊肚个人恁誠心，做下精神百貫。三跪九叩，拜請恩公過後，展出一身个本等實行降筆，斯看著該支棍仔在沙盤劃來劃去，恩公降下旨意，看鬧熱个人儕儕嘴勺勺仔緊看，目珠望到穿；吂知，阿進伯公開嘴講無幾句話，大家就笑到會揌，腸仔都打結吔。孫仔講：「𠊎就知吾公會恁樣講！」。

　　毋知猻猴仔有分人䌈起來打無？聽講阿進伯公背尾就無主持降筆咧，毋過，𠊎相信這隻笑科，會在褲浪埔流傳下去。


（四縣腔朗讀）

註1：褲浪埔是新竹縣峨眉鄉富興村的舊名。
註2：恩公廟就是富興隆聖宮，主祀關聖帝君。
徐翠真 聲檔 － 降筆

▲BACK