關西石店子之冶茶49

【文圖∕薛常威∕國立中央大學客家語文暨社會科學學系在職專班碩士生】

 

　　新竹關西係一个恬靜个客家庄，頭擺石店子老街並無鬧熱，只有辦活動時節，正會鬧熱一下。這下石店子有幾間當有特色个細店，「石店子之冶茶49」就係其中一間。「冶茶49」本來係荒廢多年，壞忒當嚴重个老屋，2015年茶農賴傳莊親手摎這間老屋重新整理過，開一間茶店。賴大哥乜係一個陶藝家，「冶茶49」使變到一個展示陶藝與茶藝个空間。好客个賴大哥會用自家親手做个茶壺，摎人客斟一杯自家種个茶，坐等來打嘴鼓。


　　賴傳莊係關西在地人，本來在銀行上班，感覺當懶頭台北个緊張生活，就轉到關西老屋過簡單个生活，做自家想做个事，學做陶藝、做茶壺，自家種茶，採用自然个農法、天生天養，就像「野茶」，這間老屋以前堵好係一間打鐵店，門牌係49號，故所安名「冶茶49」。


　　賴大哥種茶無落肥、無除草、無噴農藥，佢相信，做得自一堆雜草裡背生起來个茶樹，所生出來个茶葉應該係最好个品質。雖然茶葉有較細一滴仔，產量較少兜，毋過佢連做茶就自家來，毋使人𢯭手，用心做个茶，啉起來摎一般茶店賣个無共樣，當清香自然。佢自家乜開發出「野馬茶」，摎野茶加上原住民个香料馬告，味道還較濃，又係一種新个嘗試，乜當多人客中意。


　　摎賴大哥打嘴鼓最生趣个係聽佢念謠，佢自家創作總共有百過條个客話念謠，主要係講以前關西庄下人个生活，還過頭擺生趣个事情。

　　下擺到關西个時節，千萬做毋得漏忒這個好搞好聊个所在。

▲BACK