「學老」本來个意思係「客人」

【文／羅肇錦∕國立中央大學客家語文暨社會科學學系榮譽教授】

 

　　歷史上，所謂嶺南，主要係講五嶺之南个大潮州，包含廣東東部蓮花山脈同羅浮山脈一帶地域，也就係這下个韶州、梅州、廣州、惠州、潮州等等。這地區從唐朝以來，都係苗瑤畲客个地基主，甚至係盤瓠信仰个發源地（鳳凰山），生活在這位个民族，有早期个狸獠獞蜑，有後來个和蠻、貉獠、哈尼、活聶、輋客、山哈、山客，到今晡日个廣府人、客家人、閩南人。

　　在一般人个觀念肚，講著廣州就想著廣東人，講著潮州就想著河洛人，講著梅州就想著客家人。從來毋識想講，廣州梅州潮州都係唐朝時代个嶺南貉獠人个根據地。這個論點，做得在《六祖壇經》行由品第一篇个記載得著證明，當時五祖弘忍同惠能講：「你係嶺南人，又係貉獠，若為堪做佛？」後來个人研究指出惠能出身地，在肇慶州个新興縣。可見肇慶州應該也係嶺南。

　　當時潮州个居民全部都分人按到貉獠（hoʔ lo）。再過下去，背尾好多瑤族史研究个學者，認定明清之間廣東瑤人分布个地域，實際包含韶州、梅州、廣州、惠州、肇州、潮州。恁堵好現下个潮州人，又已多係明清以後，從泉州福州跈各任縣府官員徙過來潮州，佢兜落力推廣當時个文教，故所形成對潮州當大影響个閩南人文化。

　　毋過，老百姓个基礎，還係當地个瑤族為主个輋客人，這兜輋客人，大部分甘願放棄自家个語言文化，轉換到講閩南話寫官話漢字个閩南貉獠人（後來改河洛），兩三代過去就毋記得自家係輋客。該在，這兜做得從潮州還當多人拜三山國王同王公信仰，這兜信仰完全係瑤畲族祖傳个盤瓠信仰發展出來个。故所潮州人安到「貉獠」（後來改河洛、學老）完全係根柢个瑤畲客文化轉換過來个。其他嶺南各州个貉獠人，有兜轉換稱呼安到客人（像梅州惠州），有兜轉換語言變廣府人（像廣州肇州）。

　　再過從語言上來論，和蠻、貉獠、活聶、輋客、山哈、山客、河洛等等潮州歷史上个族名稱呼，全部係概念相同个稱呼。頭一隻字「和、貉、活、哈、客」字音接近hoʔ，本意全係「山」。第二隻字「蠻、獠、聶、洛」音近lo ne本意都係「人」个意思（今瑤語「人」有nu no lo个講法）。也就係講和蠻、貉獠、活聶、輋客、山哈、山客、河洛本義都稱「山人」，專指這兜歇在山項个民族。

　　所謂「無瑤不住山，無山不有瑤。」「無客不住山，無山不有客」就係嶺南歷史个證明。恁樣个嶺南hoʔ lo「山人」概念，經過多擺个轉換，佢這兜所講个話，在台灣就變成大家講个「河洛話」、「福佬話」、「鶴佬話」、「學老話」、「閩南話」、「台灣話」、「台語」一大拖羅無共樣个稱呼。其實簡單來講，恁多个名稱完全係起源唐朝「貉獠」這隻詞發展出來个。背尾詞个概念就從「山人」轉換到「中原人」、「福建人」、「閩南人」、「台灣人」◦

　　總个來講，嶺南hoʔ lo个稱呼，本來係講大潮州个瑤畲客族，明清之間從福建泉州福州帶來个語言文化，鼓勵讀書參加科考，王化儒化影響之下，潮州瑤畲客語言文化轉換到潮州閩南語言文化。也就係講嶺南个hoʔ lo本來係客家祖先瑤畲客一脈下來个稱呼。現下hoʔ lo變成專指潮州漳州泉州人个稱呼。台灣還較嚴重，硬豁忒嶺南hoʔ lo个稱呼，強強改稱「台語」或者「台灣話」◦


（四縣腔）
羅肇錦教授 聲檔 — 「學老」本來个意思係「客人」

▲BACK