跈阿姆轉外家

【文、圖∕陳美燕∕國立交通大學客家社會與文化在職專班碩士生】

 

面向油羅溪个大河壩
後背有山排
一條崎仔行往下轉隻彎
就到姐婆屋下

崎頂一頭朳仔樹
打盡多硬朳汀
爬上樹頂，毋堵好
會分草鞋嫲㸐著

泥磚屋个邊脣係洗身間
有門無鎖，阿姆見擺
喊𠊎企在外背掌等

灶下个灶頭
一片煮食，一片暖水
𠊎當好摎姐婆清火灰
舞到歸面歸身烏疏疏

杈缸摎豬欄兩隔壁
𠊎毋敢自家行兼去
驚該豬嘴胴伸出來尋食

共下睡間肚个大眠床
一頭聽阿姆摎姐婆打嘴鼓
一頭鼻著壁角會焗人个尿桶
迷迷痴痴入覺


（海陸腔）
陳美燕 聲檔 — 跈阿姆轉外家

▲BACK