石爺傳說

【文、圖∕徐貴榮∕國立中央大學客家語文暨社會科學學系兼任助理教授】

 

　　在中壢老街溪脣項，有一間細細隻个廟，奉祀一粒幾下尺个石頭，人人喊佢「石爺」，抑係「石靈公」。（圖1）

（圖1：石爺位置在興國市場後背，老街溪脣。）

　　聽講清朝時代，這搭仔有一個老實又善良个生理人，名仔安到張仁傑，降一个倈仔，安到信乾。這張信乾從細頭腦當好，即靈、生活（註1）、有孝，逐儕都阿腦佢係孝子。

　　無想着有一年，中壢發生土匪來搶，張仁傑在亂搶之中分土匪㓾死，屋下一下仔嗄無麼人好靠，就靠張信乾厥姆同人洗衫，賺一息仔工錢來過日仔。張信乾也逐日去河壩項撈螺仔，抑係捉兜仔魚仔、蝦公，去市場賣兜錢來貼用。

　　有一日，老街溪个河壩水好點點淰起來，淰到當遽，信乾堵堵在河壩中央，走就來毋掣。厥姆看着大聲喊救命，無奈何大水恁大又打當遽，無人敢下去救。就在這當極急个時節，大家看等信乾強強會分大水打走吔，河壩肚突然間浮起一粒大石頭，分信乾揇等。等到河壩水較退兜仔，信乾正分人救起來。

　　兩子哀為着愛感謝這粒石頭个救命之恩，就同地方仕紳參詳建議，在該河壩脣起一間亭仔，同該粒大石頭扐上來，放到亭仔項服祀。這粒石頭有求必應，緊來緊多人來拜，變到當興，來拜个人越來越多，喊佢「石爺」。到69年起拜亭个時節，正分人又喊到「石靈公」。（圖2、圖3）

（圖2：民國69.7.7興建完成拜亭。）

（圖3：『石爺』神位名稱現稱『石靈公』。）

　　這粒石頭救人个時節，堵好係七月初七，以後這日就變到神生，大家會擺牲儀祝賀。大家相信像張信乾恁有孝个人，定著會好人有好報，逢凶化吉。（本文曾刊登在《文學客家》11期101.12出版）

（註1）：即靈、生活：機警靈活，身手矯捷。生活，音sangˊvad。


（四縣腔）
徐貴榮教授 聲檔 — 石爺傳說

▲BACK