河霸个石獅公

【文、圖／鍾榮富／南臺科技大學應用英語系講座教授】

 

　　高樹鄉廣福村，大路關當地人安著河霸。河霸庄最有名个係石獅公，每年个慶典，係庄上个大事情，會做大戲，會請人客，盡鬧熱，屬於客委會客家十二節慶之一。石獅公有三座，按照年代前後，有人佮間 安著「獅老大」、「獅老二」、「獅老三」。現下祭拜个係最尾做个「獅老三」，佢也係三座之中唯一有彩色个石獅公。

　　𠊎還細个時節，大路關就有盡多石獅公个傳說。聽講頭擺客家人對武洛一路跈等河水來到大路關，看著一片平陽，就想留下來開墾。不過，當時个大路關屬於大路關社个原住民，間歇啊在北河个山頂上。原住民看著客家人搬到山下个平陽開墾土地，就想用斷水个手段，逼客家人搬走。个祖先可能也係苦怕个，硬頸个牛脾氣一來，反正就佔仔土地，歇啊下來。毋知出自哪地方个風俗，當時个能人就做了石獅公，使得闢邪，使得鎮煞，使得抵抗原住民个攻擊。

　　最早最早个石獅公，年代久遠，今下實在也無辦法考證來源同年代，有人講大概建於十八世紀末期。1857年水打庄，這隻開基「獅老大」煞分水沖倒，埋啊在泥沙底下，無人知埋啊在哪。大路關人同其他台灣人共樣，早時生活困苦，三餐難得食飽。等大家生活改善以後，就想著石獅公。故所在1918年，大家同心合力，在河壩脣个園子項，做仔第二隻石獅公。「獅老二」建立个時節，還係日本時代，當時个百姓，有兜還記得「獅老大」个歷史，相信石獅公有闢邪、鎮煞个能力。堵好附近有兩兄弟，分家以後，為了水田同旱地个多少，不時相罵、相打。其中無分著水田个兄弟，認為企啊在佢田對門个石獅公，鎮著佢運氣同風水，佢聽人講石獅公个罩門在屎窟，故所在一个暗旼茫个暗哺頭，佢就用鐵釘仔釘啊在石獅公个屎窟上。到今，那支鐵釘仔還在。

　　石獅公釘屎窟以後，可能有影失去了闢邪个能力，庄上人任佢坐啊在河霸脣个園子項，周圍長滿野草，又有蓋多苦楝樹同竹仔。園仔內，屋天暗地，每一擺有風吹來，竹葉簌簌作響，盡得人驚。1965年，大家又在「獅老二」頭前兩百公尺个地方，做第三隻石獅公(圖右)。比起來，新作个「獅老三」面容過和氣過活潑，又有彩色，盡靚盡好看。做石獅公屆時，𠊎姨丈在面前，佢講石獅裡背放有：烏布七丈，烏鴉標本一个，紅絲帶七丈，客家龜粄七塊。這兜東西聽講使得讓石獅公還魂敨氣，重有生命，守護河霸庄。

　　原先分大水沖倒埋啊在河底下个「獅老大」(圖左)，在五零年代，分人挖魚塘時，挖著頭那，1984年正全部挖起來，放啊在廣福順天宮右側。


（四縣腔）
鍾榮富教授 聲檔 － 河霸个石獅公

▲BACK