好搞个劇團

【文圖∕薛常威∕國立中央大學客家語文暨社會科學學系在職專班碩士生】

 

　　這係兩隻對表演藝術盡有熱情、愐等夢想个後生人所組成个。創辦人裡肚一個葉時廷係𠊎認識个，佢係出世在桃園新屋个客家人，自細就學習撮把戲个藝術表演，另外一個係戲劇編導演个優等生。佢兜在「替代役公益大使團」服役期間熟識，共同愐等共樣个理念，決定用「好搞个」來做創作个出發點，分表演寓教於樂，大朋友、小朋友做得在欣賞表演个歡樂當中學到更多个知識。


　　2012年佢兜摎新竹香山个一間舊陋个傳統雜貨店改成工作室，成立這「好搞个」劇團，經過一齣又一齣生趣个表演，分社區帶來樂暢。佢兜還摎一輛細拖拉庫改成行動舞台，開到台灣滿哪仔山林旮旯角个小學，包括桃園摎新竹个客庄巡迴表演，帶動偏鄉个藝術教育，乜經過歡喜个表演，摎客家个語言文化傳分小朋友。佢兜乜舉辦各類型个兒童故事劇場、撮把戲特技表演摎生日親子派對。

　　因為新个媒體普遍出現，這下當少人肯花時間出門看戲劇表演，所以觀眾就越來越少，規模較大个劇團大體使經營到當艱苦，莫講這幾個三腳貓个小腳士劇團。毋過佢兜捉得到大人襯細人看戲當歡喜个期待，就當煞猛去做，觀眾無變少顛倒較加。𠊎感覺，後生人創業斷真無恁該，社會个競爭也盡厲害，假使講無正確个目標，人講跈等講，較會迷失方向，造成失敗。假使有清楚自家个專業在哪位，做自家合意做个事情，顛倒較遽會成功。「好搞个」劇團就係一隻最好个例子。

（四縣腔）
薛常威 聲檔 — 好搞个劇團

▲BACK