細人仔普

【文∕曾俊鑾∕國立中央大學客家語文暨社會科學學系客語所碩一 朗讀∕徐翠真】

 

　　農曆七月係普渡孤魂野鬼个時節，逐年七月十四該暗晡，北埔人會在屋面前个店亭下擺一張大桌仔，桌項擺等牲儀、花果、各項餅仔零嗒摎粽仔，普渡好兄弟。

　　有一年，七月十四普渡過咧，有一個老伯姆半夜仔嗄聽著有細人仔在該噭，䟘床尋又尋毋著人，連續幾下日，佢試著心焦焦，斯到慈天宮抽籤卜卦 ，看到底係麼个情形？結果神明指示，講係十四該暗晡普渡，當多好兄弟有食祿，毋過還有當多年紀較細个「細人仔好兄弟」，因為尖毋到頭前嗄食毋著 ，所以在星光半夜出來噦噦嘶嘶。老伯姆試著佢兜盡衰過，原來係尖毋贏人正來討食，佢試著愛想隻辦法正做得。

　　毋過，這無道理啊！照理噭恁大聲應當通莊人斯聽得著，仰會就這個老伯姆有聽著，其他人無聽著呢？有影，人講「陰陽兩界、人鬼殊途」，無要緊个事情，鬼毋會作躁人，實在無奈何，鬼也知愛拜託麼儕正有效。該個老伯姆係麼儕呢？佢斯係北埔姜振驤先生个餔娘黃金妹女士，振驤先生又係麼儕呢？厥爸斯係乙未年抗日犧牲个姜紹祖先生。大家斯知，姜屋在北埔樹大影大，一儕喊大家應；夫人自家呢？佢賢淑慈慧無話講，本身也係南庄最有聲望个家族黃鍊石先生个妹仔，黃鍊石个阿太斯係1805年帶等客家鄉親開墾中港溪這條線、對斗換坪到內山該搭仔个黃祈英先生，地位摎姜屋有拚有拚，尋老夫人出面哪有毋成个道理呢？

　　該當時振驤夫人本成想另外擺一張桌，寫等分細人仔好兄弟食，毋過七月十四普渡又過忒咧，無成愛等到明年？做毋得，這還愛等當久當久，振驤夫人試著佢兜昶衰過咧，所以決定在關鬼門以前，尋一隻暗晡特別擺桌，款待細人仔好兄弟，分佢兜食飽食足。尋大家討論个結果，就擇七月二十九該暗晡，在慈天宮廟坪，擺等幾張桌，共樣擺淰淰个牲儀花果，普渡細人仔好兄弟。

　　北埔人知這件事情後，大家就共下襯，乜在店亭下擺桌。對這起勢，逐年个七月二十九，北埔人斯會特別為著細人仔好兄弟普渡，安到「細人仔普」。

　　普渡本成斯係良善風俗，表達人敬畏鬼神、行善佈施个心意；細人仔普又特別有大家關懷弱勢个心意，不管對宗教、風俗、人道个角度，𠊎認為當有意義。

　　人講積善个人定著會有好報，姜黃金妹女士享嵩壽一百歲，係一個長命婆、百歲婆。（本文以海陸腔寫成）

（海陸腔朗讀）
徐翠真 聲檔 － 細人仔普

▲BACK